გუშინ აქციის დაშლის დროს დაკავებული 6 პირის სასამართლო პროცესი 17:00 საათამდე გადაიდო. მოსამართლე ვალერიანე ფილიშვილმა დაცვის მხარის მოთხოვნა სხდომის გადადების შესახებ არ დააკმაყოფილა და ბრალდების მხარის მოთხოვნა გადადების შესახებ დააკმაყოფილა.

ადვოკატების განცხადებით, დაცვის მხარე არ იცნობს საქმის მასალებს, ამოსაღებია ვიდეო მასალები და სხვა მტკიცებულებები და ამისთვის დამატებითი დრო სჭირდებათ. მოსამართლის გადაწყვეტილების შემდეგ ადვოკატებმა მისი აცილება მოითხოვეს, ვინაიდან მიიჩნიეს, რომ გადაწყვეტილება „შსს-დან არის ნაკარნახევი".

შეგახსენებთ, რომ თბილისის საქალაქო სასამართლოში, გუშინ აქციაზე დაკავებული 6 პირის სასამართლო პროცესი გაიმართა. დღევანდელ პროცესზე გიგა მაქარაშვილის, ირაკლი კაჭარავას, დიმიტრი ბიძინაშვილის, ირაკლი ნადირაძის, დავით მჟავანაძისა და პაატა სოსონაშვილის საქმე განიხილებოდა. მათ მიმართ გამოძიება ადმინისტრაციული კოდექსის 166-ე და 173-ე მუხლებით მიმდინარეობს, რაც 15 დღით თავისუფლების აღკვეთას ან ფინანსურ სანქციას გულისხმობს.