ისრაელის მიერ სირიაში განხორციელებული თავდასხმის შედეგად 11 ადამიანი დაიღუპა, მათ შორის უმეტესობა ირანელია. ინფორმაციას ამის შესახებ ბრიტანეთში დაფუძნებული სირიის უფლებადამცველი ორგანიზაცია აცხადებს.

როგორც ცნობილია, ისრაელმა სირიაში ირანისა და სირიის სამხედრო ძალების ათეულობით სამიზნის წინააღმდეგ საჰაერო თავდასხმა განახორციელა. მოგვიანებით, ისრაელის თავდაცვის მინისტრმა, ნაფტალი ბენეტმა ირანი გააფრთხილა, რომ ისრაელი წესებს ცვლის და „ნებისმიერი, ვინც ისრაელის მიმართულებით დღის განმავლობაში შეტევას განახორციელებს, ღამით ვეღარ დაიძინებს“.

„ჩვენი გზავნილი ირანის ლიდერებისადმი მარტივია: თქვენ აღარ გაქვთ იმუნიტეტი. სადაც არ უნდა გაავრცელოთ თქვენი საცეცები, ჩვენ მათ გავანადგურებთ. ისრაელის თავდაცვის ძალები განაგრძობენ ისრაელის მოქალაქეების დაცვას“, - განაცხადა ნაფტალიმ.

მისივე თქმით, „ისრაელი ჯერ თავად რვაფეხას თავს, თეირანს არ დამუქრებია, თუმცა ამ რვაფეხას თავთან მიახლოება შესაძლებელია“.