ძალიან დასანანია, პოლიტიკოსების არასწორი მოქმედებებისა და შეცდომების გამო პოლიციისა და სპეცრაზმის გამოყენება, - ამის შესახებ უმრავლესობიდან წასულმა დეპუტატმა თამარ ჩუგოშვილმა მედიას, ბოლო პერიოდში განვითარებილ მოვლენებთან დაკავშირებით განუცხადა.
თამარ ჩუგოშვილის თქმით, კანონიერი ფორმებით გამოხატული პროტესტი სრულიად ლეგიტიმურია და ყველას აქვს უფლება, თავისი განწყობა ჰქონდეს, თუმცა პოლიტიკოსებმა კანონის ფარგლებში მოქმედება უნდა ისწავლონ.
"აზრის გამოხატვის ყველა ფორმა და ნებისმიერი მოქმედება, თუნდაც, ძალიან გაბრაზებული პოზიციიდან კანონის ფარგლებში უნდა ჯდებოდეს. კარების აჭედვა, ბოქლომის დადება და ა.შ კანონით დაცული პროტესტის ფორმები არ არის. კანონის ფარგლებში მოქმედება უნდა ვისწავლოთ, რისი დემონსტრირება იყო ვერ გეტყვით,ძალიან ცუდი საყურებელი იყო. ძალიან დასანანია, პოლიტიკოსების არასწორი მოქმედებებისა და შეცდომების გამო პოლიციისა და სპეცრაზმის გამოყენება. ეს პროცესი რამდენჯერ უნდა გაიაროთ? პოლიტიკოსებმა ისე უნდა იმუშაონ, რომ საჭირო არ იყოს მოქალაქეებისა და სპეცრაზმის დაპირისპირება", - განაცხადა ჩუგოშვილმა.