ვფიქრობ, გუნდის ის წევრები, რომლებმაც ბოლოს დატოვეს „ქართული ოცნება“, შეასრულებენ იმ როლს, რომელიც ოპოზიციას ეკისრება დემოკრატიულ ქვეყანაში, - ამის შესახებ უმრავლესობის წევრმა სოფო კილაძემ ჟურნალისტებს განუცხადა, რითაც უმრავლესობიდან წასულ დეპუტატებთან თანამშრომლობის თაობაზე დასმულ კითხვას უპასუხა.
კილაძის აზრით, ყველა კონკრეტულ შემთხვევაში, სადაც არ ემთხვევა უმრავლესობიდან წასული დეპუტატების აზრი „ქართული ოცნების" აზრს, ისინი პრინციპულები იქნებიან.
„მგონია, რომ ისინი ყველანაირ ძალადობრივ ქმედებებს, რასაც „ნაციონალური მოძრაობისგან" და მისი განშტოებებისგან ვართ მიჩვეულები, არ გამოიყენებენ. ჩვენ განსხვავებული აზრი სხვადასხვა საკითხებთან დაკავშირებით გვექნება, მაგრამ ეს ალბათ, უფრო გააძლიერებს ჩვენს დემოკრატიას, ვიდრე შეასუსტებს",-განაცხადა კილაძემ.