ესპანეთის უმაღლესმა სასამართლომ რუსეთის სამხედრო დაზვერვის კატალონიის მოვლენებში მონაწილეობის საქმეზე გამოძიება დაიწყო. ინფორმაციას EL PAÍS აქვეყნებს. დახურული გამოძიება იკვლევს ელიტარული რუსული სამხედრო ჯგუფის, სახელად „დანაყოფი 09155“-ის მონაწილეობას სეპარატისტული მოძრაობების მოქმედებებში. მედიის ცნობით, აღნიშნული დანაყოფის სახელი ევროპის ქვეყნებში დაგეგმილ სხვა დესტაბილიზაციებსაც უკავშირდება. სწორად ამ ჯგუფს უკავშირდება ე.წ. სკრიპალის საქმე და მონტენეგროში გადატრიალების მცდელობა.

ეს არ არის პირველი შემთხვევა, როდესაც რუსეთი და მისი ჯაშუშები ეჭვმიტანილნი იქნენ კატალონიის სეპარატისტულ მოძრაობაზე გავლენის მოხდენაში. თებერვალში, საგამოძიებო ვებსაიტზე Bellingcat, რუსი საიდუმლო სამსახურის რამდენიმე ოფიციალური დოკუმენტი გამოქვეყნდა, სადაც წარმოდეგნილი იყო GRU-ს აგენტების კავშირები და მათი ბარსელონაში ვიზიტების დეტალები.