შეგნებულად იქმნება შთაბეჭდილება, თითქოს საქართველოში არის მხოლოდ ორი პოლიტიკური მხარე - „ქართული ოცნება“ და „ნაციონალური მოძრაობა“ და თუ არ იქნება „ოცნება“, მაშინ ხელისუფლებაში დაბრუნდება რევანშისტულად განწყობილი „ნაციონალური მოძრაობა“, - ამის შესახებ დეპუტატმა გია ჟორჟოლიანმა პრესკონფერენციაზე განაცხადა, სადაც მიმდინარე პოლიტიკური მოვლენები შეაფასა.

მისი თქმით, ეს ვითარება ბლოკავს ჯანსაღ პოლიტიკურ დისკუსიას ქვეყნის განვითარების საკითხებზე.

ჟორჟოლიანი ამბობს, რომ პარლამენტის მიერ მიღებულმა გადაწყვეტილებამ კიდევ ერთხელ დაარწმუნა, რომ „ქართულ ოცნებას“ არ სურს შეცვალოს არსებული პოლიტიკური ვითარება, შექმნას შესაძლებლობა რეალური ცვლილებებისთვის ქვეყნის ცხოვრებაში.

„ჩვენ, „სოციალ-დემოკრატები საქართველოს განვითარებისთვის“, ვუჭერდით და ვუჭერთ მხარს პროპორციულ საარჩევნო სისტემას. მეტიც, ამ სისტემის ჩვენს მიერ შეთავაზებული ვარიანტი ითვალისწინებდა რეგიონულ წარმომადგენლობას და დეპუტატების ბმას ადგილობრივ ინტერესებთან. რამდენიმე დღის წინ კვლავ მივმართეთ უმრავლესობას, მაგრამ უშედეგოდ. ის, რომ ჩვენი ვარიანტი არ გახდა სერიოზული განხილვის საგანი, მიუთითებს საკითხის განხილვის კონიუქტურულ, დემოკრატიისთვის საზიანო ხასიათზე.

განსხვავებით „ქართული ოცნებისა“ და იმ პარტიებისგან, ვინც ქუჩის აქციებს მართავს, ჩვენ „სოციალ-დემოკრატები“ არ ვიბრძვით ხელისუფლების შენარჩუნებისთვის, ხელისუფლების მორიგი ცვლილებისათვის ან უბრალოდ პარლამენტში მოხვედრისთვის. ჩვენ ვიბრძვით ქვეყანაში ნამდვილი რევოლუციური ცვლილებების განხორციელებისთვის. ამ ცვლილებების განხორციელებისთვის არ გვჭირდება არეულობა - გვჭირდება უმრავლესობა, ვინც ჩვენს მიზნებს გაიზიარებს.

თქვენი მხარდაჭერით მზად ვართ შევცვალოთ ხელისუფლება ნებისმიერი საარჩევნო სისტემის პირობებში და განვახორციელოთ ისეთი რეფორმები, რომელიც ქვეყანას რეალურად განავითარებს”,-განაცხადა ჟორჟოლიანმა.

ჟორჟოლიანის განცხადებით, 25 ნოემბერს, 16:00 საათზე თანამედროვე ხელოვნების მუზეუმში პარტია ხედვებს წარადგენს.