სახელმწიფო უსაფრთხოების სამსახურთან მიმდინარე საპროტესტი აქციაზე, სამართალდამცველებმა მოძრაობა „გაბედეს“ აქტივისტი ოთარ ბექაური დააკავეს. ამის შესახებ „ინტერპრესნიუსს“ ერთ-ერთმა აქტივისტმა ლაშა მახათაძემ განუცხადა.

მისივე ინფორმაციით, ბექაური სამართალდამცველებმა შეხლა-შემოხლის პროცესში დააკავეს.

სუს-ის შენობის გვერდითა შესასვლელთან სამოქალაქო მოძრაობა „გაბედე“ საპროტესტო აქციას მართავს. ისინი სუს-ის ხელმძღვანელთან, გრიგოლ ლილუაშვილთან შეხვედრას ითხოვენ. მათივე განმარტებით, მათ სურთ კითხვებზე პასუხი მოისმინონ, რატომ აკავებენ სამოქალაქო მოძრაობის აქტივისტებს.

ადგილზე მობილიზებულია საპატრულო პოლიცია.

სუს-ის შენობის შესასვლელის ჩაკეტვის მცდელობას სამართალდამცველებსა და მოძრაობის წარმომადგენლებს შორის მცირე დაპირისპირება მოყვა.