ბექა ბასილაია - გორის იზოლატორში იმდენად კარგია, რომ 13 დღე მეცოტავება კიდეც - მადლობა მოსამართლედწოდებულ ვალერიანე ფილიშვილს დაუგეგმავი შვებულებისთვის

18 ნოემბრის აქციის დაშლისას დაკავებული ადვოკატი ბექა ბასილაია გორის იზოლატორიდან წერის ავრცელებს.

როგორც ბასილაია განმარტავს, მისთვის 13-დღიანი პატიმრობის შეფარდების გადაწყვეტილებას არ გაასაჩივრებს. დაკავებული აღნიშნულის რამდენიმე მიზეზსაც ასახელებს.

„სალამი გორიდან, გორის იზოლატორის მე-3 საკნიდან, სადაც იმდენად კარგია, რომ 13 დღე პატიმრობისთვის მეცოტავება კიდეც. მადლობა მოსამართლედწოდებულ ვალერიანე ფილიშვილს დაუგეგმავი შვებულებისთვის.

სერიოზულად კი გასაჩივრების უფლებით არ ვისარგებლებ შემდეგ გარემოებათა გამო:

1) მურუსიძე-ჩინჩალაძის სასამართლოს მოწყალებას არ ვთხოვ. ყველამ ვიცით, რომ ჩვენ ვართ პოლიტიკური პატიმრები და ჩვენთან დაკავშირებული გადაწყვეტილებები მიიღება არა სასამართლო დარბაზებში, არამედ ივანიშვილის კარნახით, რასაც უსიტყვოდ ემორჩილებიან ფილიშვილები, მურუსიძეები, იაშვილები, ჩახნაშვილები, ხორავები, კლანია სახელი მათი;

2) ბიძინა ივანიშვილი საბოლოოდ დაადგა პუტინიზაციის გზას, მისი ღიად პრორუსული რეჟიმისგან შეფარდებული 13-დღიანი პატიმრობა რა მოსატანია იმ გმირი ქართველების ტყვეობასთან, ვინც საოკუპაციო რეჟიმების ციხეებში იმყოფებიან. ყოველგვარი პათეტიკის გარეშე, სოლიდარობა ვაჟა გაფრინდაშვილს და მის ბედში მყოფ ჩვენს თანამოქალაქეებს, მეუხერხულება კიდეც, მათ გვერდით რომ ვახსენებ თავს გორში, მხოლოდ 13 დღით, ოჯახის, მეგობრების, თანამებრძოლების, კოლეგების ყურადღებისა და მზრუნველობის ქვეშ მყოფი პატიმარი.

3) ბრძოლა, რაც დაწყებულია, არ შეჩერდება, გრძელდება, აზვირთდება და წალეკავს ბიძინა ივანიშვილის მტერთან მოკეკლუცე, მეგობრების გადამგდებ, საკუთარი მოქალაქეების გამცურებელ რეჟიმს. რეჟიმს, რომელიც ძალოვანთა ძალასღა ეყრდნობა მხოლოდ და ისინიც მოიღლებიან, არა უძლურებისგან, არამედ უსამართლო ბრძანებათა შესრულებისგან და აი მაშინ, ბიძინა დარჩება მარტო და შეიმუსრება, როგორც ასტაპორელი ვაჭარი კრაზნუს მო ნაკლოზი.

პ.ს. აღმოჩნდა, რომ ამ ტექსტამდე, ჩემს მეგობარსა და კოლეგას ივანე პეტრიაშვილს ჩემთან შეუთანხმებლად, ცხადია კეთილი მიზნებით, შეუტანია სააპელაციო საჩივარი, რაც უახლოეს დროში იქნება ანულირებული.

საქართველოს მთავარ პროკურატურას მოვუწოდებ ჩემი პატიმრობის ვადასთან დაკავშირებით ნუ შეიტანთ პროტესტს, როგორც ეს წინა შემთხვევაში გააკეთეთ, საზოგადოების ზეწოლის შედეგად. არავის სჭირდება თქვენი ყალბი ჰუმანიზმი“, - აცხადებს ბასილაია.

ლილია შევცოვა - თუ აშშ საქართველოდან არ გასულა, ამერიკელები საქართველოში დაუპირისპირდებიან რუსულ გავლენებს, რომლებიც რამდენადაც ვიცი, ქვეყანაში საკმაოდ მრავლადაა
ქართული პრესის მიმოხილვა 22.01.2021
არჩილ მორჩილაძე - ბიუჯეტის ხარჯზე მედიკამენტების ხარჯების ანაზღაურებას სახელმწიფოს მიერ დასაქმებული ადამიანები და მათი ოჯახის წევრები, 250 000-ზე მეტი ადამიანი იღებს, როცა უამრავი სოციალურად დაუცველი ამ დაფარვის მიღმაა დარჩენილი
რა გეგმები აქვს ქუთაისის საერთაშორისო უნივერსიტეტს და რა პროგრამებს სთავაზობს სტუდენტებს? - ინტერვიუ უნივერსიტეტის კანცლერ მაგდა მაღრაძესთან
სილქფესტი მომხმარებლებს უქმეებზე ულიმიტო ინტერნეტ და უსასრულო სასაუბრო პაკეტების გააქტიურებას სთავაზობს
დეველოპერული კომპანია „ბლოქსი“ ქალაქ ზუგდიდში მულტიფუნქციური სავაჭრო ცენტრის მშენებლობას იწყებს
ევროკავშირის და FAO-ს მხარდაჭერით ქართველი ფერმერები შემოსავლებს და წარმოებას ზრდიან