საპარლამენტო უმრავლესობის წევრი რატი იონათამიშვილი ადასტურებს, რომ ფრაქცია "ქართული ოცნების" თავმჯდომარის თანამდებობაზე მისი კანდიდატურის შესახებ კონსულტაციები გაიმართა. მისი განცხადებით, საბოლოო გადაწყვეტილების მიღება ფრაქციის სხდომაზე მოხდება. "გარკვეული კონსულტაციები იყო. მოგეხსენებათ, ფრაქციის თავმჯდომარის არჩევის საკითხი რეგულირდება ფრაქციის დებულების მე-7 მუხლით. შესაბამისად, ფრაქციის თავმჯდომარის კანდიდატურის წაყენების უფლება გააჩნია ფრაქციის სრული შემადგენლობის 1/3-ს, ხოლო არჩევისთვის აუცილებელია ფრაქციის სრული შემადგენლობის 1/2-ის მხარდაჭერა. დაველოდოთ ფრაქციის სხდომას, სადაც საბოლოო გადაწყვეტილება იქნება მიღებული. თვითმიზანი არასდროს არ არის რაიმე თანამდებობა. ნებისმიერი თანამდებობა არის მხოლოდ საშუალება, რომ ვემსახუროთ ჩვენს მოსახლეობას,"- განაცხადა იონათამიშვილმა.