იუსტიციის უმაღლესი საბჭოს წევრი ნაზი ჯანეზაშვილი დღევანდელ საბჭოს სხდომაზე რუპორის გამოყენებას გეგმავს. როგორც მან ჟურნალისტებთან საუბრისას აღნიშნა, რუპორს აქვს როგორც პრაქტიკული, ასევე სიმბოლური მნიშვნელობა.
“რუპორით მოვედი იმიტომ, რომ საბჭოს მოსამართლე წევრები და რამდენიმე არამოსამართლე წევრი წარმოადგენს ჩინჩალაძის რუპორებს და ამას აქვს სიმბოლური დატვირთვა. მეორე მხრივ, თქვენ იცით, რომ გიორგი მიქაუტაძემ დააყენა ახალი სისტემა სხდომათა დარბაზში. მას არ ესმის მნიშვნელობა იუსტიციის უმაღლესი საბჭოსი, სადაც არის მხოლოდ 14 წევრი და დააწესა ახალი რეგულაციები, რომ მისი ნებართვის გარეშე ჩვენ ვერ ვრთავთ მიკროფონებს. იმისათვის, რომ საზოგადოებას გავაგონო ჩემი ხმა სხდომათა დარბაზიდან, იძულებული ვარ მაგიდაზე დავიდო რუპორი და საჭიროების შემთხვევაში გამოვიყენო როგორც ტექნიკური საშუალება იმისათვის, რომ ხალხმა ჩემი ხმა გაიგოს. თუ სხდომათა დარბაზში არ მექნება შესაძლებლობა, რომ მიკროფონი ჩავრთო საჭიროებისამებრ, ეს ნიშნავს იმას, რომ სხდომები იქნება დახურული. მხოლოდ ვიზუალური მხარე და ფოტო-მასალა საზოგადოებას არ სჭირდება იმისათვის, რომ გაიგოს რა ხდება საბჭოში. მნიშვნელოვანია ხმა, ამიტომ დღეიდან გამოვიყენებ ამ რუპორს თუ კი დამჭირდება სხდომათა დარბაზში, თუ არადა ჩამითონ მათ მიკროფონი, როგორც ამას კანონი მოითხოვს. თვითნებობა და წესების შემოღება მიქაუტაძის მხრიდან, არის უკანონობა. მას ეს არ შეუთანხმებია ჩვენთან, ყოველ შემთხვევაში პირადად ჩემთან ამაზე მსჯელობა არ ყოფილა”,- განაცხადა ნაზი ჯანეზაშვილმა.