ნიკოლოზ ალავიძემ საქართველო - იაპონიის ბიზნესფორუმის გახსნაში მიიღო მონაწილეობა

25 ნოემბერს, სასტუმრო „შერატონ გრანდ თბილისი მეტეხი პალასში“ საქართველო - იაპონიის ბიზნესფორუმი გაიხსნა, რომელშიც 40 - მდე იაპონური და 100 - ზე მეტი ქართული კომპანიის წარმომადგენლებმა მიიღეს მონაწილეობა.

როგორც „ინტერპრესნიუსს“ საქართველოს ეკონომიკისა და მდგრადი განვითარების სამინისტროდან აცნობეს, ფორუმი საქართველოს ეკონომიკისა და მდგრადი განვითარების, საგარეო საქმეთა და ინფრასტრუქტურის სამინისტროების, საქართველოში იაპონიის საელჩოს, სააგენტოს “აწარმოე საქართველოში”, იაპონიის საერთაშორისო თანამშრომლობის სააგენტოს (JAICA), იაპონიის საგარეო ვაჭრობის ორგანიზაციის (JETRO) და საქართველოს სავაჭრო სამრეწველო პალატის თანამშრომლობით ჩატარდა.

ბიზნესფორუმი მისასალმებელი სიტყვით ეკონომიკისა და მდგრადი განვითარების მინისტრის მოადგილე ნიკოლოზ ალავიძემ, საგარეო საქმეთა მინისტრის მოადგილემ, ალექსანდრე ხვთისიაშვილმა და იაპონიის ელჩმა საქართველოში ტადაჰარუ უეჰარამ გახსნეს.

„დღევანდელი ბიზნესფორუმი რიგით მეხუთეა. მასში უფრო მეტი იაპონური კომპანია მონაწილეობს, რაც ძალიან გვახარებს. ჩვენ შეგვიძლია იაპონურ კომპანიებს შევთავაზოთ მსოფლიოში ერთ-ერთი ხელსაყრელი ბიზნეს და საგადასახადო გარემო, სტაბილურად მზარდი ეკონომიკა, თავისუფალი ვაჭრობის შეთანხმებების გამოყენების შესაძლებლობა ევროკავშირთან, თურქეთთან, უკრაინასთან და სხვა ქვეყნებთან, აგრეთვე შესაძლებლობები, რომლებსაც საქართველოს მთავრობა სთავაზობს საერთაშორისო ინვესტორებს. ჩვენ გახსნილი ვართ იაპონურ ბიზნესთან თანამშრომლობისთვის. იმედი მაქვს, რომ ბიზნესფორუმი გახდება დასაბამი სამომავლო ნაყოფიერების თანამშრომლობისა საქართველოსა და იაპონიის საქმიან წრეებს შორის,“ - განაცხადა ნიკოლოზ ალავიძემ.

მისასალმებელ სიტყვაში იაპონიის ელჩმა საქართველოში ტადაჰარუ უეჰარამ ხაზი გაუსვა იმ გარემოებას, რომ წლევანდელ ბიზნესფორუმზე გაცილებით მეტმა იაპონურმა კომპანიამ მიიღო მონაწილეობა, ვიდრე მანამდე. მისი თქმით, ესაა იმის დასტური, რომ იაპონური კომპანიები საქართველოს ბიზნესშესაძლებლობებით დაინტერესდნენ.

„იმედი მაქვს, რომ უფრო მეტი იაპონური კომპანია შემოვა საქართველოს ბაზარზე და ამით შეიქმნება მეტი სამუშაო ადგილი შეიქმნება. აღნიშნული გარემოება ასევე დაეხმარება ქართულ კომპანიებს, გაზარდონ პროდუქტიულობა და ხარისხი, რაც მეტად კონკურენტულს გახდით მათ სხვა საერთაშორისო კომპანიებთან შედარებით,“ - განაცხადა იაპონიის ელჩმა საქართველოში.

ფორუმზე საქართველოს საინვესტიციო შესაძლებლობებზე პრეზენტაციები გააკეთეს ეკონომიკისა და მდგრადი განვითარების სამინისტროს სსიპ სააგენტოს „აწარმოე საქართველოში“ ხელმძღვანელმა მიხეილ ხიდურელმა და თანაინვესტირების ფორუმის გენერალური დირექტორის მოადგილემ გიორგი დანელიამ. ასევე გამახვილდა ყურადღება საქართველოში ბიზნესის კეთების შესაძლებლობებსა და რისკების მართვაზე.

ბიზნესფორუმი B2B შეხვედრებით დასრულდა, რომლის დროსაც საქართველოსა და იაპონიის საქმიანი წრეების წარმომადგენლებმა პოტენციურ პარტნიორებთან სამომავლო თანამშრომლობის შესაძლებლობები განიხილეს.

მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს