საქართველოს პარლამენტის წინ აქციის მონაწილეები იკრიბებიან. როგორც ცნობილია საპროტესტო აქცია საკანონმდებლო ორგანოსთან 19:00 საათზე დაიწყება, რომელსაც ოპოზიციური პოლიტიკური პარტიების წარმომადგენლები შეუერთდებიან. აქციაზე დასასწრებად მოქალაქეები რეგიონებიდანაც ჩამოვიდნენ.

სამოქალაქო აქტივისტები, მოქალაქეები და პოლიტიკური პარტიების წარმომადგენლები პარლამენტის მიერ 2020 წლის საპარლამენტო არჩევნების პროპორციული სისტემით ჩატარების თაობაზე მომზადებული კონსტიტუციური კანონპროექტის ჩაგდებას გააპროტესტებენ და მოითხოვენ არჩევნები პროპორციული სისტემით ჩატარდეს.

როგორც აქციის ერთ-ერთმა ორგანიზატორმა ნოდარ რუხაძემ „ინტერპრესნიუსს" განუცხადა, იგეგმება რუსთაველზე გზის გადაკეტვა და პარლამენტის შენობის პიკეტირება.

„19:00 საათიდან გვაქვს აქცია დაანონსებული, როდესაც ხალხის დიდი რაოდენობა მოვა, რუსთაველს გადავკეტავთ და შენობის პიკეტირებას დავიწებთ, რომ ხვალ სასესიო დღე ჩავარდეს. ჩვენი აზრით სისულელეა ნებისმიერი საკითხი, თუნდაც ბიუჯეტის განხილვა იმ პირობებში, როდესაც სახელმწიფოს სამივე შტო მიტაცებულია ერთი ოლიგარქის მიერ და ბოლოს მან წაგვართვა თავისუფალი არჩევნები. ამ არჩევნების დაბრუნებას ვცდილობთ, რომ ერთპარტიულობა, ერთმმართველობა და ბელადობა ამ ქვეყანაში დასრულდეს და ყველას მიეცეს თანაბარი საშუალება, რომ პარლამენტში მოხვდეს“, - განაცხადა ნოდარ რუხაძემ.

პარლამენტის მიმდებარე ტერიტორიაზე სამართალდამცველები არიან მობილიზებული.

რუსთაველის გამზირზე ამ დროისთვის საავტომობილო მოძრაობა თავისუფალია.