რამდენჯერაც დაგვარბევენ, იმდენჯერ მეორე დღეს ვიდგებით პარლამენტთან, - ამის შესახებ „ინტერპრესნიუსს“ „ნაციონალური მოძრაობის“ ერთ-ერთმა ლიდერმა ზაალ უდუმაშვილმა განუცხადა.

მისივე თქმით, ისინი დღეს მცირეხნიან აქციას გეგმავენ, რის შემდეგაც გადაინაცვლებენ პარლამენტის შენობის შესასვლელებთან.

„სრულიად მშვიდობიანად დავხვდებით, თუ გადაწყვეტენ დარბევას. ჩვენი გეგმა არის ის, რომ ძალიან ხმამაღალი პროტესტი გავაგონოთ ბიძინა ივანიშვილს. აქციის შემდეგ გადავნაწილდებით პარლამენტის შესასვლელებთან, რადგან დავიცვათ პარლამენტი იმ დეპუტებისგან, რომლებიც ქართველი ხალხის საწინააღმდეგო გადაწყვეტილებებს იღებენ. მათ არ აქვთ უფლება, თავს უწოდებდნენ ქართველი ხალხის არჩეულ დეპუტატებს, ისინი არიან მავნებლები, რომლებიც ზიანს აყენებენ ყოველი თავისი ნამოქმედარით საქართველოს მოსახლეობას,“ - განაცხადა უდუმაშვილმა.

მისივე თქმით, დღეს ივანიშვილმა ღიად თქვა, რომ ხალხის აზრი არ აინტერესებს.

„მან თქვა, რომ მაინტერესებს ის, რაც მიმაჩნია რომ ჩემთვის არის უკეთესი და ეს განცხადება გააკეთებინა კალაძეს. ჩვენ სხვანაირად ვფიქრობთ, ჩვენ ბევრნი ვართ და ვნახოთ ვინ უფრო ჯიუტია. სიმართლე დღეს არის ხალხის მხარეს. ეს ხალხი იცავს თავის ხვალინდელ დღეს,“ - განაცხადა უდუმაშვილმა.