ქვეყანაზე შექმნილ სიტუაციაზე პირველ რიგში პასუხისმგებელია დესტრუქციული ოპოზიცია და შემდეგ ხელისუფლება, - ამის შესახებ პარლამენტის უმრავლესობის წევრმა სიმონ ნოზაძემ ჟურნალისტებს პარლამენტში ბიუროს სხდომის დაწყებამდე განუცხადა.

როგორც ნოზაძემ აღნიშნა, ის თავის წილ პასუხისმგებლობას არ გაექცევა.

"როდესაც წესრიგი ირღვევა და მე წესრიგის დარღვევად ვთვლი ბლოკირებას, მაშინ სამართალდამცავი სისტემა იღებს ზომებს. მე სპეცრაზმის დახმარებით არ შემოვედი, ჩვეულებრივ მივედი ფეხით დაუბრკოლებლად," - განაცხადა ნოზაძემ.

მედიის წარმომადგენლები ასევე დაინტერესდნენ, რამდენად გამართლებულია აქციის მონაწილეების დაშლა გამთენიის 5 საათზე, რაზეც ნოზაძე აცხადებს, რომ "სხდომა უნდა ჩატარდეს და რა მნიშვნელობა აქვს როდის გაიყვანენ?"

"შინაგან საქმეთა სამინისტრო ყველაფერს თვითონ გადაწყვეტს", - განაცხადა ნოზაძემ.

რაც შეეხება პროპორციულ სისტემაზე გადასვლასთან დაკავშირებით მმართველი პარტიის დაპირებას, ხოლო „შემდეგ დაპირების არშესრულებას“, ნოზაძის თქმით, "ეს ტრაგედია არ არის".