დღეს პიკეტირება არ იგეგმება, რადგან ხვალინდელი პლენარული სხდომა გადაიდო, - ამის შესახებ სამოქალაქო მოძრაობა „სირცხვილიას“ ერთ-ერთმა ლიდერმა, შოთა დიღმელაშვილმა პარლამენტის წინ განაცხადა.

მისი თქმით, დღეს, 19:00 საათზე ისინი აქციის მონაწილეებს თავიანთ გეგმებს გააცნობენ.

„აქცია დაიწყება შვიდ საათზე, ადამიანები როცა გამოვლენ სამსახურებიდან და მოვლენ. დღეს პიკეტირება არ იგეგმება, რადგან ხვალინდელი პლენარული სხდომა გადაიდო. ჩვენ ვიდექით პიკეტში და ახლა პოლიცია თავად აპიკეტებს აქაურობას. შვიდ საათზე გავაცნობთ გეგმებს, ასევე გაცხადდება ლოკალური აქტივობების გეგმაც. აქციებს რაც შეეხება, გრძელდება ჩვეულებრივად”,- განაცხადა დიღმელაშვილმა.

ცნობისთვის, პარლამენტის შესასვლელებთან, ჭიჭინაძისა და ჩიტაძის ქუჩებზე მობილიზებულია პოლიცია.