თინა ბოკუჩავა - თუ ხუთშაბათს ექნებათ პარლამენტის სხდომის ჩატარების მცდელობა, ხუთშაბათს მოვახდენთ პარლამენტის პიკეტირებას

შეშინებულმა ხელისუფლებამ ხვალინდელი პლენარული სხდომა გადადო, მაგრამ თუ ხუთშაბათს ექნებათ სხდომის ჩატარების მცდელობა, ხუთშაბათს მოვახდენთ პარლამენტის პიკეტირებას, - ამის შესახებ "ნაციონალური მოძრაობის" წევრმა, თინა ბოკუჩავამ ოპოზიციის სამოქმედო გეგმებზე საუბრისას, "ლეიბორისტული პარტიის" ოფისთან განაცხადა, სადაც ოპოზიციონერი ლიდერების შეხვედრა ცოტა ხნის წინ დასრულდა.

მისი თქმით, ოპოზიცია ხელისუფლებას მუდმივ დისკომფორტს შეუქმნის მანამდე, სანამ მათ მოთხოვნებს არ დააკმაყოფილებს.

"პიკეტირება, როგორც წესი, პლენარული სესიების კვირაში იქნება. ოთხშაბათი დღეც არის სასესიო კვირა, მაგრამ შეშინებულმა ხელისუფლებამ ხვალინდელი სხდომა გადადო. შეიძლება ჰქონდეთ მცდელობა, რომ ჩაატარონ ხუთშაბათს. მაშინ ხუთშაბათს იქნება პიკეტირება. თუ პარასკევს ჩაატარებენ, პარასკევს იქნება, თუ მომავალ კვირას ჩაატარებენ, მომავალ კვირას იქნება. იქნება მიდმივი დისკომფორტი "ქართული ოცნებისთვის", მანამ არ შეასრულებენ დანაპირებს", - განაცხადა ბოკუჩავამ.

როგორც მან აღნიშნა, პარლამენტთან საპროტესტო აქციები გაგრძელდება.

"ბუნებრივია, შევუერთდებით აქციას. ასევე ვაპირებთ, რომ საპროტესტო აქციები გაგრძელდეს პარლამენტთან. ნებისმიერი მცდელობა, რომ პარლამენტმა ჩაატაროს პლენარული სხდომა, უნდა იყოს ძალიან დიდი დისკომფორტის შემცველი "ქართული ოცნების" თითოეული დეპუტატისთვის. ხვალინდელი სხდომა იცით, რომ შეშინებულებმა გადადეს, მაგრამ შეიძლება ზეგ ან მაზეგ ჰქონდეთ მცდელობა, რომ ჩაატარონ სხდომა. რა თქმა უნდა იქნება პიკეტირება და პროტესტი. არ გავჩერდებით", - აღნიშნა ბოკუჩავამ.

მისივე თქმით, ოპოზიციაში არსებობს სრული კონსენსუსი იმასთან დაკავშირებით, რომ უნდა გაგრძელდეს პროტესტი მანამდე, სანამ არ მიაღწევენ თავისი მოთხოვნების შესრულებას. მისივე განცხადებით, "ოპოზიციის ამგვარი ერთიანობა არის ბიძინა ივანიშვილისთვის, ერთ-ერთი ყველაზე დიდი საფრთხე და თავის ტკივილი" და სწორედ ამიტომ შეინარჩუნებენ ერთიანობას".

მისი თქმით, დღევანდელი შეხვედრის მიზანია, რომ გააგრძელონ კოორდინირებული მოქმედება "ერთად ერთის წინააღმდეგ" მანამდე, სანამ „ივანიშვილს არ შეასრულებინებენ იმ დანაპირებს, რაც ხალხზე გასცა".

იოსებ ბარათაშვილი - ახლა მთავარია, გამოძიებამ უტყუარად დაადგინოს იმ პირების ვინაობა, რომელთა ქმედებამაც გამოიწვია შაქარაშვილის გარდაცვალება
ქართული პრესის მიმოხილვა 10.07.2020
ალექსეი მალაშენკო - ვინც არ უნდა მოიგოს საქართველოს არჩევნებში, აფხაზეთისა და სამხრეთ ოსეთის საკითხებში არაფერი შეიცვლება, ამიტომ, კრემლისთვის პრინციპული მნიშვნელობა არ აქვს, ვინ გაიმარჯვებს
ყაზახეთ-საქართველოს თანამშრომლობის ახალი ეტაპი იწყება
სუბსიდირებული იპოთეკური სესხი - ახალი შესაძლებლობა ტერაბანკისგან
სილქნეტის მობილური აბონენტები თიბისის მობაილბანკით სარგებლობას ინტერნეტის დახარჯვის გარეშე შეძლებენ