საქართველო ევროსაბჭოს თავმჯდომარე გახდა

დღეს ევროპის საბჭოს მინისტრთა მოადგილეების კომიტეტის სხდომა გაიმართა, რომლის ფარგლებშიც საქართველომ საფრანგეთიდან მინისტრთა კომიტეტის თავმჯდომარეობა ოფიციალურად გადმოიბარა.

კომიტეტის სხდომაზე, საფრანგეთის ევროპულ საქმეთა სახელმწიფო მინისტრმა, ამელი დე მონშალენიმ საფრანგეთის თავმჯდომარეობის პერიოდში მიღწეული შედეგების შესახებ კომიტეტს ინფორმაცია მიაწოდა. გამოსვლის შემდეგ, საფრანგეთის სახელმწიფო მინისტრმა საქართველოს საგარეო საქმეთა მინისტრს თავმჯდომარეობა ოფიციალურად გადმოაბარა და სიმბოლურად გასაღები გადმოცა.

აღნიშნულთან დაკავშირებით, ევროპის საბჭოს და საქართველოს შორის გაფორმდა შესაბამისი ხელშეკრულება, რომელსაც ხელი საქართველოს საგარეო საქმეთა მინისტრმა დავით ზალკალიანმა და ევროპის საბჭოს გენერალურმა მდივანმა მარია პეიჩინოვიჩ ბურიჩმა მოაწერეს.

უკვე მოქმედი თავმჯდომარის რანგში, მინისტრმა ზალკალიანმა კომიტეტის წინაშე საქართველოს თავმჯდომარეობის პრიორიტეტების პრეზენტაცია გამართა.

თავის გამოსვლაში მინისტრმა საფრანგეთს წარმატებული თავმჯდომარეობა მიულოცა და აღნიშნა, რომ დიდი პატივია უკვე მოქმედი თავმჯდომარის როლში ევროპის საბჭოს მინისტრთა მოადგილეების კომიტეტის სხდომაზე გამოსვლა.

„თავმჯდომარე ქვეყნის რანგში, საქართველოს უნიკალური შესაძლებლობა ეძლევა თავისი წვლილი შეიტანოს ორგანიზაციის სამი ძირითადი ღირებულების - დემოკრატია, ადამიანის უფლებების და კანონის უზენაესობა - დაცვაში“ - განაცხადა მინისტრმა.

მინისტრმა კომიტეტს საქართველოს თავმჯდომარეობის პრიორიტეტები გააცნო და დეტალურად ისაუბრა თითოეული მათგანის მნიშვნელობაზე და აღნიშნული პრიორიტეტების ფარგლებში დაგეგმილ მაღალი დონის კონფერენციებზე, რომლებიც წლის განმავლობაში ქ. სტრასბურგში საქართველოს თავმჯდომარეობის ეგიდით გაიმართება.

საქართველომ თავმჯდომარეობისთვის ოთხი პრიორიტეტი განსაზღვრა: 1. ადამიანის უფლებები და გარემოს დაცვა; 2. სამოქალაქო ჩართულობა გადაწყვეტილების მიღების პროცესში; 3. ბავშვზე ორიენტირებული მართლმსაჯულება - აღდგენითი მართლმსაჯულების ევროპული გამოცდილება; 4. დემოკრატიის გაძლიერება განათლების, კულტურისა და ახალგაზრდობის ჩართულობით.

თემატური ღონისძიებების გარდა, თავმჯდომარეობის პერიოდში, სტრასბურგში დაგეგმილია სხვადასხვა კულტურული ღონისძიებები, რომელიც ხელს შეუწყობს საქართველოს პოპულარიზაციას.

ევროპის საბჭოს მინისტრთა მოადგილეების კომიტეტის სხდომის დასრულების შემდეგ, თავმჯდომარის, საქართველოს საგარეო საქმეთა მინისტრის დავით ზალკალიანის სახელით ოფიციალური მიღება გაიმართა.

ზაალ ანჯაფარიძე - შაქარაშვილის საქმესთან დაკავშირებით კითხვები უფრო მეტია, ვიდრე პასუხები, რაც გამოწვეულია რამდენიმე გარემოებით
ქართული პრესის მიმოხილვა 06.07.2020
ვიქტორ ყიფიანი - შავი ზღვის რეგიონისადმი დასავლეთის მიდგომა ოპერატიულად გადახედვასა და მისადაგებას საჭიროებს
უპროცენტო განვადება და საჩუქარი მომხმარებელს - რას სთავაზობს კომპანია ,,ჯეო გლასი"
ბიზნეს-ცენტრი ატრიუმი - პრაქტიკული არჩევანი
„PSP ყველგან შენი ოჯახის გვერდით“ კამპანიის ფარგლებში ბრიტანული კონცეფციის აფთიაქი წყნეთში გაიხსნა
ტერაბანკი ბიზნესკლიენტებს საქმიანობის პოპულარიზაციაში დაეხმარება
ლიბერთი იპოთეკური სესხების სუბსიდირების სახელმწიფო პროგრამაში ჩაერთო