ეს არ იყო ხელშეკრულების მსგავსი, ეს იყო კეთილი ნება იმ რთულ სიტუაციაში, რომელიც მოჰყვა 20 ივნისის მოვლენებს, - ამის შესახებ “ქართული ოცნების” თავმჯდომარემ ბიძინა ივანიშვილმა 2020 წელს პროპორციულ საარჩევნო სისტემაზე გადასვლის თაობაზე ივნისში მის მიერ გაკეთებულ განცხადებასთან დაკავშირებით განაცხადა.
მან პარლამენტის წინ მიმდინარე აქციებზეც ისაუბრა.
“ხელოვნური ხმაურები ჩვენ ბევრი გვქონია, მაგრამ ამ შემთხვევაში, მე ვფიქრობ, რომ ჩემგან მსგავსის გამეორება არ იქნება სწორი, რამეთუ ჩემი გაკეთებული განცხადება არის მიზეზი ამ ხმაურისა. თანაც “ქართული ოცნების” უმრავლესობა ამას დაეთანხმა. ჩვენ გავაკეთეთ გარკვეული დაპირება, ეს იყო ცალმხრივი დაპირება. ხშირად პოლიტიკურ პარტიებს შორის ხდება რაღაც შეთანხმება, ან საზოგადოების ნაწილთან ხდება შეთანხმება, რაღაცის საფუძველზე თმობენ და მის შესრულებას შესაბამისად მოითხოვენ. ეს არ ყოფილა ხელშეკრულების მსგავსი, ეს იყო კეთილი ნება იმ რთულ სიტუაციაში, რომელიც მოჰყვა 20 ივნისის მოვლენებს. ეს იყო ჩემი ინიციატივა, გუნდში მე მივედი ამ ინიციატივით”, - განაცხადა ივანიშვილმა ტელეკომპანია "იმედის" ეთერში.