ვის გაუგია, შსს იძახდეს სამ-ოთხ თვეზე მეტს ვეღარ გავუძლებთო? მეც ასე მგონია, მეტს ნამდვილად ვერ გაუძლებენ, - ამის შესახებ „ევროპული საქართველოს“ ლიდერმა გიგა ბოკერიამ ჟურნალისტებთან საუბრისას განაცხადა.

მისი თქმით, ხელისუფლებამ სამართალდამცავები კრიმინალზე და ქვეყნის დაცვაზე უნდა მიმართოს.

„შს მინისტრს ვუსმენდი და მან თქვა, რომ დაიღალნენ პოლიციელებიო და მესმის, ამ უკანონო და სამარცხვინო ბრძანებების შესრულებით დაიღალნენ და ნუ აძლევენ მაშინ ამ ბრძანებებს. ნუ ღლიან ამ ხალხს და იმ საქმეზე მიმართონ, რაც ქვეყანას სჭირდება, კრიმინალზე და ქვეყნის დაცვაზე. რაც ხდება ქვეყანაში, ვხედავთ. შს მინისტრმა თქვა, ძალიან მაგარი ფრაზა, სამი-ოთხი თვე გავუძლებთო, მე მაგასაც ვეჭვობ, რომ სამი-ოთხი თვე გაუძლებენ, მაგრამ ჩვენ ბევრად მეტს გავუძლებთ. რატომ წელავენ ამ სამ-ოთხ თვეს? დღესვე დაამთავრონ ეს ამბავი ჯობია“,- განაცხადა ბოკერიამ.

ცნობისთვის, პარლამენტთან, აქციის მონაწილეების მხრიდან პიკეტირება დასრულდა, თუმცა, როგორც აქციის მონაწილეებმა განაცხადეს, პროტესტი მომდევნო დღეებშიც გაგრძელდება.