საჭიროა ევროპას უფრო მეტი ინფორმაცია მივაწოდოთ. დეზინფორმაციის მიწოდების დახვეწილი სქემები გარკვეულწილად ახდენს გავლენას, - ამის შესახებ პარლამენტის პირველმა ვიცე-სპიკერმა გია ვოლსკიმ ევროსაბჭოში გაკეთებული კრიტიკული განცხადებების კომენტირებისას ჟურნალისტებს განუცხადა.
მან ასევე მედია დაადანაშაულა იმაში, რომ სახელმწიფოებრივი მნიშვნელობის საკითხების გადაფარვას ხელს უწყობენ.
"ინფორმაციის მოძრაობის სისტემა უკვე დიდი ხანია აწყობილია. ეს ახალი არ არის, დასაყრდენს ეძებენ ოპონენტები საერთაშორისო დონეზე და რაც მოვისმინე, არის საკითხები რომელიც ეხება ორივე მხარის პასუხისმგებლობას, კანონის დაცვას, შესაძლო მოლაპარაკებას და კონსულტაციებს. ეს ის სტანდარტია, რომელსაც იცავენ საერთაშორისო პარტნიორები და ორგანიზაციები. თუკი რაიმე კრიტიკაა, ანალიტიკოსები, ჟურნალისტები კარგად ხედავენ, რეალურად რა ვითარებაა, რაც უფრო აგრესიულია გამოხატულება ოპონირების, მით უფრო მნიშვნელოვანი და საინტერესო საკითხები იხილება ქვეყნისთვის. მაგალითად, ახლა განხილვაზე სახელმწიფო მნიშვნელობის საკითხებია, მიწის რეგისტრაციის, სასოფლო -სამეურნეო კოოპერატივების და წარმოების განვითარების, რაც რევოლუციურ ცვლილებას მოახდენს სოფლად. მაგრამ ამის გადაფარვა მნიშვნელოვანია, სტრატეგიაა, გეგმაა და ამ გეგმას არის დღეს აყოლილი ჩვენი მედია. ევროპასაც საჭიროა უფრო მეტი ინფორმაცია მივაწოდოთ. დახვეწილი სქემები დეზინფორმაციის მიწოდების გარკვეულწილად ახდენს გავლენას," - განაცხადა გია ვოლსკიმ.