ადეკვატური პასუხი ეცემა არაკანონიერ ქმედებებს, რომელიც მიმართულია ჩვენი საქმიანობის ხელის შეშლისკენ, კონსტიტუციური უწყებების მუშაობის პარალიზებისა და საბოტირებისკენ,- ამის შესახებ ეკონომიკისა და მდგრადი განვითარების მინისტრმა ნათია თურნავამ მთავრობის სხდომის დასრულების შემდეგ აქციებთან დაკავშირებით განაცხადა.

მინისტრის თქმით, ეკონომიკური ბლოკის მინისტრების საზრუნავი ახლა ისაა, რომ ბიზნესი და ინვესტორების არ დაფრთხნენ.

„აქციები შეიძლება ჩვენთვის დისკომფორტის შემქმნელი იყოს, მაგრამ რა ნაწილშიც ეს არ ეწინააღმდეგება კანონს, სრულიად მისაღები დემოკრატიული პროცესია. რაც შეეხება არაკანონიერ გამოვლინებებს , რომლებიც მიმართულია ჩვენი მუშაობის ხელის შეშლისკენ და ჩვენი კონსტიტუციური უწყებების მუშაობის პარალიზებისა და საბოტირებისკენ, ამას, ძალიან ადეკვატური პასუხი ეცემა, სრულიად ცივილიზებული და მე არ მგონია, რომელიმე განვითარებულ სახელმწიფოში რამე სხვა რეაქცია ჰქონოდეს ხელისუფლებას ამაზე.

რასაკვირველია, ნებისმიერი რადიკალიზაცია და დესტაბილიზაციის მცდელობა ნეგატიურია ეკონომიკისთვის . ეკონომიკური ბლოკის მინისტრების საზრუნავი ახლა ისაა, რომ მიუხედავად ამ ფონისა, მაქსიმალურად ბიზნესი , ინვესტორი არ დავაფრთხოთ და ეკონომიკა იმ ტემპით განვითარდეს, როგორც თავიდან იყო ჩაფიქრებული“,- განაცხადა თურნავამ.