პარლამენტის ვიცე-სპიკერი გია ვოლსკი მიიჩნევს, რომ აბაშიძე-კარასინის მოლაპარაკებების ფორმატი არა მხოლოდ ეკონომიკური საკითხების ჭრილშია მნიშვნელოვანი, არამედ კონფლიქტის მოგვარების კუთხითაც. ამის შესახებ მან პრაღაში ზურაბ აბაშიძისა და გრიგორი კარასინის შეხვედრაზე საუბრისას ჟურნალისტებთან განაცხადა.
"ეს არის სტრატეგიული გადაწყვეტილება, რომ ამ ფორმატში იყოს მოლაპარაკებები. ამ ფორმატზე მნიშვნელოვნად არის დამოკიდებული ბევრი ეკონომიკური საკითხი და ასპექტი, რომელიც ჩვენ გვაინტერესებს და ჩვენს ინტერესებშია. თუკი მომავალში კონფლიქტის ოდესმე მოგვარებაზე ვფიქრობთ, რა თქმა უნდა, პატარა უმნიშვნელო კუნძულები უნდა არსებობდეს, მიუხედავად იმისა, რომ უმძიმესი პოლიტიკური და სამხედრო დაპირისპირება არის სახეზე",- განაცხადა გია ვოლსკიმ.