ეკონომიკისა და მდგრადი განვითარების მინისტრი, ნათია თურნავა იმედოვნებს, რომ 20-მილიონიანი საგარანტიო ფონდი, რომელიც მცირე და საშუალო ბიზნესის ფინანსებზე წვდომის გაზრდის მიზნით შეიქმნა, "წელს თუ არა, გაისად მაინც იმუშავებს".

"ინტერპრესნიუსის" კითხვაზე , ამ ეტაპზე რატომ არ მუშაობს 20-მილიონიანი საგარანტიო ფონდი, მინისტრი აცხადებს რომ "დღეს ნებისმიერი მსურველი რომ მივიდეს, სისტემა მუშაობს და მისი განაცხადის მიღება მოხდება."

"საკრედიტო-საგარანტიო მექანიზმი მხარდაჭერის ერთ-ერთი მნიშვნელოვანი სქემაა, რომელსაც ბიზნესს ვთავაზობთ.ბიუჯეტში მობილიზებულია თანხები. პირველი, რაც მინისტრად დანიშვნის დროს გავაკეთე ისაა, რომ დავაჩქარე ამ მექანიზმისთვის საჭირო ყველა იურიდიული დოკუმენტის შექმნა. ბანკებთან ჯერ კიდევ ივნისში მოვაწერეთ ხელშეკრულებას ხელი. „სოფტებზე“ მუშაობენ ბანკები, რათა კიდევ უფრო დაჩქარდეს ამ მექანიზმის ათვისება. ვაკეთებთ მეტ პოპულარიზაციას. ჩვენ დიდი იმედი გვაქვს, რომ თუ წელს არა, გაისად მაინც იმუშავებს. ამისთვის მომავალი წლის ბიუჯეტში გამოყოფილია თანხა", - განუცხადა მინისტრმა "ინტერპრესნიუსს".

ცნობისთვის, საკრედიტო-საგარანტიო მექანიზმი „აწარმოე საქართველოში“ სააგენტოს ქვეშ 1-ელი აპრილიდან ამოქმედდა, კომერციულ ბანკებთან ხელშეკრულებებს კი 25 ივლისს მოეწერა ხელი.

როგორც „ინტერპრესნიუსს“ სააგენტო „აწარმოე საქართველოში“ განუცხადეს, ბანკებს ბიზნესის მხრიდან განაცხადების მიღება არ დაუწყიათ, რადგან კვლავ გრძელდება მუშაობა პროგრამულ უზრუნველყოფაზე.

„საკრედიტო საგარანტიო სქემა არის ინოვაციური და საკმაოდ კომპლექსური პროექტი, რაც მოითხოვდა სრულიად ახალ პროგრამულ უზრუნველყოფას. სწორედ აღნიშნული სქემის კომპლექსურობიდან გამომდინარე აქტიურად მიმდინარეობს მუშაობა კომერციულ ბანკებსა და პროგრამული უზრუნველყოფის მიმწოდებელ კომპანიას შორის, ხოლო აღნიშნული პროცესის დასრულების შემდგომ კომერციულ ბანკებს შესაძლებლობა ექნებათ მიიღონ განაცხადები აღნიშნული სქემის ფარგლებში”, - აცხადებენ სააგენტო „აწარმოე საქართველოში“.