სასტუმრო „შერატონში“ ახალგაზრდობის სააგენტოს ორგანიზებითა და ევროკავშირისა და ევროსაბჭოს მხარდაჭერით, საერთაშორისო კონფერენცია თემაზე „ადგილობრივ და რეგიონალურ ცხოვრებაში ახალგაზრდობის მონაწილეობის მხარდაჭერა“ გაიმართა. ამის შესახებ „ინტერპრესნიუსს“ ახალგაზრდობის სააგენტოდან აცნობეს.
მათივე ინფორმაციით, კონფერენციაში მონაწილეობა მიიღეს საქართველოს ცენტრალური ხელისუფლების, ადგილობრივი თვითმმართველობის, ახალგაზრდულ სექტორში აქტიური სამოქალაქო საზოგადოებისა და საერთაშორისო ორგანიზაციების წარმომადგენლებმა, ასევე ევროკავშირისა და აღმოსავლეთ პარტნიორობის წევრი 31 ქვეყნიდან მოწვეულმა სტუმრებმა.
კონფერენციის მიზანია, ახალგაზრდობის მონაწილეობის კონცეფციისა და ფორმატის შესახებ არსებული ცოდნის გაღრმავება, ადგილობრივ და რეგიონალურ ცხოვრებაში ახალგაზრდების მონაწილეობის საკითხებთან დაკავშირებით არსებული გამოცდილების გაზიარება, ასევე სხვადასხვა ადგილობრივ და საერთაშორისო დაინტერესებულ მხარეს შორის თანამშრომლობის ხელშეწყობა.