გრიგოლ ვაშაძე - არსად მითქვამს, რომ ვფიქრობ, თითქოს დღეს რამე შედეგს მივაღწევთ

გაერთიანებულო ოპოზიციის ერთ-ერთი ლიდერის, გრიგოლ ვაშაძის განცხადებით, არ აქვს მოლოდინი, რომ ხელისუფლების წარმომადგენლებთან დღევანდელი შეხვედრა შედეგს გამოიღებს. ამის შესახებ მან სასტუმრო „ბილტმორში" განაცხადა, სადაც მმართველი გუნდის, ოპოზიციისა და დიპლომატიური კორპუსის შეხვედრა გაიმართება.

„არსად მითქვამს, რომ ვფიქრობ, თითქოს დღეს რამე შედეგს მივაღწევთ. ძალიან დიდი მადლობა ჩვენს სტრატეგიულ მოკავშირეებს, განსაკუთრებით ევროპის კავშირს, შეერთებულ შტატებს იმისთვის, რომ მათ თავის თავზე იტვირთეს ეს ძალიან მძიმე მისია და დაიწყეს ორგანიზება ამ დიალოგის, რომელიც ჩვენს საზოგადოებას ძალიან სჭირდება. მეორე - ის, რომ გუშინდელი კოშმარული დღისა და ღამის შემდეგ, რაც ქუთაისში მოაწყო ხელისუფლებამ, სსიპ-ებისა და ა(ა)იპ-ების და სხვა სახელმწიფო სამსახურების თანამშრომლების მეშვეობით ჩვენ ოფისთან, დიდი ეჭვი გვეპარება, რომ რამისთვის იყვნენ მზად. მესამე მთავარი, ჩვენ კომპრომისული ნაბიჯი უკვე გადავდგით, „ქართულმა ოცნებამ" აიღო თავის თავზე პოლიტიკური და მორალური ვალდებულება, რომ პროპორციული წესით ჩაატარებდა 2020 წლის არჩევნებს, ამაზე უარი თქვა. ჩვენ შევთავაზეთ გამოსავალი, წავედით კომპრომისზე, თუ ამაზე არ დათანხმდნენ, მაშინ პრობლემა არ არის, გაგრძელდება ყველაფერი ისევ ისე, როგორც არის. საქართველოს მოქალაქე არის დაპირისპირებული „ქართულ ოცნებასთან", ჩვენ რაც შეგვეხება, ოპოზიციურ პარტიებს ვერავინ დაგვადანაშაულებს იმაში, რომ დიალოგზე არ დავთანხმდით ან დიალოგი ჩავშალეთ", - განაცხადა ვაშაძემ.

დიმიტრი ცქიტიშვილი - არ მინდა დავიჯერო, რომ „ქართულ ოცნებას“ იგივე დაემართა, რაც „ნაციონალურ მოძრაობას“
ქართული პრესის მიმოხილვა 09.12.2019
რამაზ საყვარელიძე - არც ხელისუფლება ჰგავს პოლიტიკის დიდოსტატს და არც ოპოზიცია, ამიტომ არც ისე იწვიმებს, როგორც ისმის რევოლუციის ჭექა-ქუხილი