„მონა“, „პროპორციული დაიდოს“ - ამ შეძახილებით შეხვდნენ პარლამენტის ყოფილ თავმჯდომარეს, უმრავლესობის წევრს, ირაკლი კობახიძეს მოძრაობა „სირცხვილიას“ წევრები. ირაკლი კობახიძე „ქორთიარდ მარიოტში“ რეგიონალურ საპარლამენტო კონფერენციაზე დასასწრებად მივიდა.

მას მედიასთან კომენტარი არ გაუკეთებია.

აქციის მონაწილეები აცხადებენ, რომ ირაკლი კობახიძეს კვლავ დაელოდებიან და გამოსვლისას ისევ მოუწყობენ „სირცხვილის კორიდორს“.

აქციის მონაწილეებს თან აქვთ პლაკატები: „წლის საუკეთესო მონა", „თავისუფლება ირაკლი კობახიძეს".

ცოტა ხნის წინ, სასტუმრო „ქორთიარდ მარიოტთან" ადამიანთა ჯგუფი მივიდა. ისინი აცხადებენ, რომ პროტესტს არ უერთდებიან და სასტუმროსთან უბრალოდ დგანან. „თავისუფლების მოედნის ხედით ვტბები. უბრალოდ ვარ მოსული, აქვე ვცხოვრობ და ჩამოვისეირნე", - განაცხადა ერთ-ერთმა პირმა ჟურნალისტებთან.

მოძრაობა „სირცხვილიას" ერთ-ერთი წევრი ამბობს, რომ ეს ადამიანები „ქართული ოცნების" აქტივისტები არიან. მისივე თქმით, ბოლო დროს, სადაც მათ აქცია დაგეგმეს, მსგავსი შემთხვევები ყველგან ხდება და „ქართული ოცნება" მათ კონტრაქციას უმართავს.

იხილეთ ვიდეო