პარლამენტის ბიურომ საგარეო ურთიერთობათა კომიტეტის ყოფილი თავმჯდომარის, სოფიო ქაცარავასთვის უფლებამოსილების ვადაზე ადრე შეწყვეტის საკითხი ცნობად მიიღო.
როგორც პარლამენტის თავმჯდომარემ არჩილ თალაკვაძემ აღნიშნა, ქაცარავამ ბიუროს თავად მიმართა.
ასევე, ბიურომ იმსჯელა პარლამენტის გამოკლებული წევრის, ვანო ზარდიაშვილის ადგილმონაცვლის, თემურ გოცირიძის პარლამენტის წევრის უფლებამოსილების ცნობის თაობაზე.
გარდა ამისა, ბიუროზე იმსჯელეს პარლამენტის გარემოს დაცვისა და ბუნებრივი რესურსების კომიტეტიდან კახა კუჭავას გასვლის შესახებ, რაც ბიურომ ასევე ცნობად მიიღო.
ბიურომ ცნობად მიიღო თავდაცვისა და უშიშროების კომიტეტის თავმჯდომარის პირველ მოადგილედ კობა კობალაძის არჩევის შესახებ. ასევე, საგარეო ურთიერთობათა კომიტეტის თავმჯდომარის პირველ მოადგილედ ცოტნე ზურაბიანის არჩევის შესახებ.
გარდა ამისა, ბიურომ განიხილა საპარლამენტო ფრაქცია „ქართული ოცნების“ თავმჯდომარის, მამუკა მდინარაძის მიმართვა. მდინარაძემ პარლამენტის თავმჯდომარის მოადგილედ და უმრავლესობის ლიდერად არჩევის გამო ფრაქციის თავმჯდომარის თანამდებობა დატოვა. მის მოვალეობას დიმიტრი სამხარაძე შეასრულებს.
ბიურომ რეგისტრაციაში გაატარა ფრაქცია „დამოუკიდებელი დეპუტატები“, რასაც დეპუტატთა უმრავლესობამ მხარი დაუჭირა.