აშშ-ის ხელისუფლებამ განაცხადა, რომ საფრანგეთიდან იმპორტირებულ 2.4 მილიარდი აშშ დოლარის ღირებულების საქონელზე ტარიფს 100 პროცენტამდე გაზრდის, - ამის შესახებ ინფორმაციას დასავლური მედია საშუალებები ავრცელებენ.
მათივე ინფორმაციით, გაზრდილი ტარიფები შეეხება საფრანგეთიდან იმპორტირებულ შამპანურს, ხელჩანთებს, ყველს და სხვა პროდუქტებს.
ამ ნაბიჯით აშშ პასუხობს საფრანგეთის მიერ ციფრულ სერვისებზე დაწესებულ გადასახადს.
აშშ-ის სავაჭრო წარმომადგენლობის ოფისი აცხადებს, რომ საფრანგეთის მიერ დაწესებული ბეგარა, რომელიც საერთაშორის საგადასახადო პრინციპებსა და პოლიტიკასთან სრულ შეუსაბამობაშია, აზარალებს ამერიკულ კომპანიებს, მათ შორის Alphabet Inc’s Google (GOOGL.O)-ს, Facebook Inc (FB.O)-ს, Apple Inc (AAPL.O)-სა და Amazon.com Inc (AMZN.O)-ს.
შეგახსენებთ, რომ საფრანგეთმა მიიღო კანონი, რომლითაც ციფრულ სერვისებს 3 პროცენტიანი ბეგარა დაუწესა. კანონი ეხებათ იმ კომპანიებს, რომელთა შემოსავალიც საფრანგეთში 25 მილიონ ევროზე მეტი, ხოლო მსოფლიო მასშტაბით - 750 მილიონი ევროა.