სახელმწიფო აუდიტის სამსახურის "ბიუჯეტის მონიტორის" მონაცემებით, 2019 წლის 9 თვის განმავლობაში საქართველოს მთავრობამ მივლინებებზე 62.3 მილიონი ლარი დახარჯა, რაც 46 მილიონი ლარით აღემატება 2018 წლის ანალოგიური პერიოდის მაჩვენებელს.

უფრო კონკრეტულად, მივლინებებზე 2 მლნ ლარი დახარჯა პარლამენტმა და მასთან არსებულმა ორგანიზაციებმა. საქართველს პრეზიდენტის სამივლინებო ხარჯმა 1.6 მილიონი ლარი შეადგინა. მივლინებებზე 2.4 მილიონი ლარი დახარჯა მთავრობის ადმინისტრაციამ.

რაც შეეხება სამინისტროების სამივლინებო ხარჯებს, 9 თვეში 1.5 მილიონი ლარი დახარჯა ფინანსთა სამინისტრომ, 1.6 მილიონი ლარი ეკონომიკისა და მდგრადი განვითარების სამინისტრომ, 293 833 ლარი რეგიონული განვითარებისა და ინფრასტრუქტურის სამინისტრომ, 666 377 ლარი იუსტიციის სამინისტრომ, 1.9 მილიონი ლარი დახარჯა საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრომ, 2.2 მილიონი ლარი საგარეო საქმეთა სამინისტრომ, აუდიტის სამსახურისთვის შესაბამისი ინფორმაცია არ მიუწოდებია თავდაცვის სამინისტროს, 4.4 მილიონი ლარი დახარჯა შინაგან საქმეთა სამინისტრომ, 3.1 მილიონი ლარია გარემოს დაცვისა და სოფლის მეურნეობის სამინისტროს სამივლინებო ხარჯი, 5.2 მილიონი ლარი დახარჯა განათლების, მეცნიერების, კულტურისა და სპორტის სამინისტრომ.

აღსანიშნავია, რომ მივლინების ხარჯი მოიცავს როგორც ქვეყნის შიგნით, ისე ქვეყნის გარეთ თანამშრომელთა მივლინებაზე გაწეულ ხარჯებს.