„თავისუფალი ზონის” წევრებმა საგარეო საქმეთა სამინისტროსთან აქცია-პერფორმანსი გამართეს. მათ თბილისში რუსული ენისა და კულტურის ცენტრის გახსნის შესახებ გავრცელებული ინფორმაცია გააპროტესტეს.
აქციის მონაწილეებმა სამინისტროსთან სიმბოლური მავთულხლართები მიიტანეს, რომელზეც საბჭოთა რეჟიმის დროს რეპრესირებული ქართველი საზოგადო მოღვაწეების ფოტოები იყო მიმაგრებული. აქციის მონაწილეებს ასევე ხელში ეჭირათ საოკუპაციო ძალების მიერ უკანონოდ დაკავებული ექიმის, ვაჟა გაფრინდაშვილის ფოტოები. აქციის მონაწილეებმა სამინისტროს ჭიშკარს სიმბოლურად მავთულხლართი მოახვიეს.
„როდესაც ამდენი დევნილი გვყავს და ამდენი ოკუპირებული ტერიტორია გვაქვს, მაშინ როდესაც ვაჟა ექიმი დღეის მდგომრეობით ისევ ტყვეობაშია, იმის ნაცვლად, რომ განიხილონ ეს თემა და უმოკლეს დროში მოხდეს ვაჟა ექიმის გათავისუფლება, ეს ადამიანები მიდიან და ჩვენი ქვეყნის ბიუჯეტის ხარჯზე იხილავენ რუსული კულტურისა და ენის შემსწავლელი ცენტრის საქართველოში გახსნას, რასაც ჩვენ არ დავუშვებთ”,- განაცხადა აქციის ერთ-ერთმა მონაწილემ.
შეგახსენებთ, რომ რუსი დიპლომატის, გრიგორი კარასინის განცხადებით, დეკემბრის შუა რიცხვებში, თბილისში, რუსული ენისა და კულტურის ცენტრი გაიხსნება, „რომელიც უდავოდ მნიშვნელოვან როლს შეასრულებს რუსეთსა და საქართველოს შორის ურთიერთობების განვითარებაში“.