წალენჯიხის პოლიციის სამმართველოს თანამშრომელს ბესო ფიფიას აღკვეთი ღონისძიების სახით პატიმრობა შეეფარდა. მას ბრალად მისივე თანამშრომლის, მამუკა ქარდავას განზრახ მკვლელობის მცდელობა ედება. აღნიშნული გადაწყვეტილებით, ზუგდიდის რაიონული სასამართლოს მოსამართლემ შოთა ბიჭიამ პროკურორ დავით პაპავას შუამდგომლობა დააკმაყოფილა.
როგორც დავით პაპავამ პროცესზე განაცხადა, არსებობს მიმალვის, ახალი დანაშულის ჩადენის და მოწმეებზე ზემოქმედების საფრთხეები. პროკურორის განმარტებით, ბრალდებულს თანამშრომელთან კონფლიქტი ადრეც ჰქონდა, ხოლო 3 დეკემბერს რამდენჯერმე მისი მისამართით ცეცხლსასროლი იარაღიდან გაისროლა.
ბრალდებულის ადვოკატი არ დაეთანხმა ბრალდების მხარის პოზიციას. მისი თქმით, არ არსებობს ახალი დანაშაულის ჩადენისა და მოწმეებზე ზემოქმედების საფრთხე. უფლებადამცველი აცხადებს, რომ მოწმეები რომელიც ამ საქმესთან კავშირში იყვნენ, უკვე დაკითხულია და მათზე ზემოქმედება, მით უმეტეს, რომ ისინი პოლციელები არიან, ადვილი არ იქნება. მან სასამართლოს 100 000 ლარიანი გირაო შესთავაზა, რაც არ დაკმაყოფილდა.
შეგახსენებთ, რომ წალენჯიხაში პოლიციელებს შორის დაპირისპირება, რა დროსაც ერთ-ერთმა კოლეგა სამართალდამცავს ესროლა, 3 დეკემბერს მოხდა. ის დააკავეს. გენერალური პროკურატურის ინფორმაციით, მომხდართან დაკავშირებით გამოძიება სისხლის სამართლის კოდექსის 19.108 მუხლით მიმდინარეობს, რაც განზრახ მკვლელობის მცდელობას გულისხმობს.