არ ვფიქრობ, რომ პოზიტიურია ასეთი ვიზიტები, რაღაც სეპარატისტული ვიზიტივით გამოდის, მაგრამ შენიშვნას ვერ მივცემ იმ თვალსაზრისით, რომ ეს ნინო ბურჯანაძის პოლიტიკური არჩევანი და მისი პოლიტიკური ნიშაა, -ამის შესახებ პარლამენტის პირველმა ვიცე-სპიკერმა გიორგი ვოლსკიმ მედიას განუცხადა, რითაც ნინო ბურჯანაძის მოსკოვში ვიზიტს გამოეხმაურა.
ვოლსკის თქმით, პარალელური ურთიერთობები რუსეთთან, გარდა იმისა რასაც სახელმწიფო გეგმავს და ახორციელებს და რომელსაც მხარს საერთაშორისო პარტნიორები უჭერენ, ქვეყნისთვის კარგი არ არის.
„არ ვფიქრობ, რომ პოზიტიურია ასეთი ვიზიტები, რაღაც სეპარატისტული ვიზიტივით გამოდის, მაგრამ შენიშვნას ვერ მივცემ იმ თვალსაზრისით, რომ ეს მისი პოლიტიკური არჩევანი და მისი პოლიტიკური ნიშაა. სამწუხაროა, რომ ვაჟა გაფრინდაშვილის თემით სპეკულაციის კიდევ ახალი ასპარეზი გაჩნდა. ყველამ ერთად ვიმუშავოთ და ამაზე შეჯიბრს ნუ დავიწყებთ. არ მგონია, რომ რუსეთს სურვილი ჰქონდა მისი განთავისუფლების და ამ სურვილის გაღვიძება არის დღეს ჩვენი ამოცანა ასეთი პიროვნული ურთიერთობით. პრობლემა გაცილებით უფრო ღრმაა", - განაცხადა ვოლსკიმ.