ერაყში უცნობი შეიარაღებული პირები ტაჰირის მოედანთან ახლოს საპროტესტო აქციის მონაწილეებს თავს დაესხნენ. დაღუპულია 16 მომიტინგე და 3 პოლიციელი,- ამის შესახებ ინფორმაციას „როიტერსი“ ავრცელებს.

სააგენტოს ცნობით, გარდა ამისა, თავდამსხმელებმა ცეცხლსასროლი და ცივი იარაღების გამოყენებთ 70 -მდე ადამიანი დაჭრეს.

ერაყის უზენაესმა შიიტმა ლიდერმა, აიათოლა ალი სისტანიმ მომხდარი ძალადობა დაგმო და განაცხადა, რომ ქვეყანამ ახალი პრემიერ-მინისტრი კონსტიტუციით გათვალისწინებულ ვადაში და უცხო ძალების ჩარევის გარეშე უნდა აირჩიოს.

შეგახსენებთ, ერაყის პრემიერ-მინისტრმა ადილ აბდულ-მაჰდიმ რამდენიმე დღის წინ განაცხადა, რომ თანამდებობას ტოვებს მასობრივი საპროტესტო გამოსვლების ფონზე, რომლებსაც ასობით დემონსტრანტის სიკვდილი მოჰყვა.

ერაყის კანონმდებლობის თანახმად, ახალი პრემიერ-მინისტრი და მინისტრთა კაბინეტი პარლამენტის მიერ პრემიერ-მინისტრის ოფიციალურად გადაყენების დღიდან 15 დღის ვადაში უნდა აირჩიონ. ერაყის პარლამენტმა ადილ აბდულ-მაჰდის გადადგომა კვირას დაამტკიცა.