23 წლის ახალგაზრდა ქალი, რომელიც ინდოეთში გააუპატიურეს და შემდეგ ცეცხლი წაუკიდეს, ნიუ-დელის საავადმყოფოში გარდაიცვალა. როგორც საავადმყოფოში „როიტერსს“ განუცხადეს, მას გული გაუჩერდა.
ექიმების განცხადებით, ქალს სხეულის 95% ჰქონდა დამწვარი.
რამდენიმე დღის წინ, ახალგაზრდა ქალმა სასამართლოს მიმართა რამოდენიმე მამაკაცის წინააღმდეგ, რომლებმაც ის გააუპატიურეს. ერთ-ერთი მამაკაცი პოლიციამ დააკავა, თუმცა ის მოგვიანებით გირაოთი გაათავისუფლეს.
აღნიშნული მამაკაცი, თანამზრახველებთან ერთად ქალს სწორედ იმ დროს დაესხა თავს, როცა ის სასამართლოში მიდიოდა. ახალგაზრდა ქალი გაიტაცეს და ცეცხლი წაუკიდეს.
როგორც „როიტერსი“ წერს, ქვეყანაში გაუპატიურების მსოფლიოში ერთ-ერთი ყველაზე მაღალი მაჩენებელია. მხოლოდ უთარ პრადეშის რეგიონში, 2017 წლიდან მოყოლებული დღემდე გაუპატიურების 4200 შემთხვევა დაფიქსირდა.