შეერთებული შტატები არ დაისვენებს მანამ, სანამ ირანსა და მთელს მსოფლიოში უკანონოდ დაკავებულ თითოეულ ამერიკელს შინ, საყვარელ ადამიანებთან არ დააბრუნებს, - ამის შესახებ აშშ-ის პრეზიდენტი დონალდ ტრამპი სოციალურ ქსელ „ტვიტერში“ წერს, რითაც ის ირანსა და აშშ-ს შორის პატიმრების გაცვლას ეხმიანება.

ტრამპი ირანს „სამართლიანი მოლაპარაკებებისთვის“ მადლობას უხდის.

„ობამას ადმინისტრაციის დროს დაკავებული ტრამპის ადმინისტრაციის დროს დააბრუნეს. მადლობა ირანს სამართლიანი მოლაპარაკებებისთვის. ვხედავ, ჩვენ შეთანხმებას მივაღწევთ,“- წერს დონალდ ტრამპი.

აშშ-ის პრეზიდენტი შვეიცარიის მთავრობას გაწეული დახმარებისთვის მადლობას უხდის.

შეგახსენებთ, შეერთებულმა შტატებმა და ირანმა პატიმრები გაცვალეს. ირანმა აშშ-ის მოქალაქე სიუე ვანგი დააბრუნა სამშობლოში, რომელიც სასჯელს შპიონაჟის ბრალდებით იხდიდა, აშშ-მ კი ირანელი მასუდ სოლეიმანი გაათავისუფლა პატიმრობიდან, რომელიც აშშ-ის მიერ ირანის წინააღმდეგ დაკისრებული სანქციების დარღვევაში იყო ბრალდებული.

პატიმრების გაცვლაზე მოლაპარაკებები შვეიცარიის შუამავლობით ხორციელდებოდა, რომელიც ირანში აშშ-ის დიპლომატიურ ინტერესებს წარმოადგენს მას შემდეგ, რაც 1979 წელს ვაშინგტონსა და თეირანს შორის დიპლომატიური ურთიერთობები შეწყდა.