სამედიცინო ფაკულტეტების სტუდენტები ჯანდაცვის სამინისტროსგან რეზიდენტების საკვალიფიკაციო გამოცდაზე თანხის დაწესებისა და 520-ე დადგენილების გაუქმებას მოითხოვენ, რაც საყოველთაო ჯანდაცვის სისტემაში დაფინანსების განახევრებას გულისხმობს.
თეთრი ხალათებითა და ლოზუნგით - “ნუ გამხდი ხალათს”, სტუდენტები, ჯანდაცვის სამინისტროსკენ მსვლელობას აწყობენ, სადაც აქცია-პერფორმანსის გამართვას გეგმავენ. აქტივისტებს ხელში ტრანსფარენტები უჭირავთ წარწერებით: “ნუ გვევაჭრებით”, “ნუ გადაარჩენ მათ საფულეს”, “ნუ გამაქცევ”.
როგორც თბილისის სახელმწიფო სამედიცინო უნივერსიტეტის სტუდენტმა ნიკა ავალიანმა “ინტერპრესნიუსთან” საუბრისას განაცხადა, მათი მოთხოვნაა, რომ ჯანდაცვის სამინისტრომ 586-ე და 520-ე დადგენილებები გააუქმოს.
“მოთხოვნა გვაქვს ჯანდაცვის სამინისტროს მიმართ, 586-ე და 520-ე დადგენილების გაუქმება. 586-ე გულისხმობს რეზიდენტების და რეზიდენტობის შემდგომ საკვალიფიკაციო გამოცდებზე გადასახადის დაწესებას, რომელიც მოიცავს 80 და 120 ლარს. 520-ე დადგენილება კი გულისხმობს საყოველთაო ჯანდაცვის სისტემაში რეფორმას, რომელიც ანახევრებს თანხებს. მაგალითად, კარდიოლოგიურ პაციენტებს სახელმწიფო თუ აფინანსებდა ვთქვათ, 15 ათასით, ახლა 8 ათასით დააფინანსებს. ეს იწვევს იმას, რომ კლინიკებში მცირდება სამუშაო ადგილები რადგან რამდენიმე კლინიკაში უკვე გაათავისუფლეს უმცროსი ექიმები. ასევე, იწვევს იმას, რომ მოსახლეობა გადახდისუნარიანობას კარგავს”,- განაცხადა სტუდენტმა.