„შენების მოძრაობის“ ლიდერის დავით უსუფაშვილის განცხადებით, გამომდინარე იქიდან, რომ ხელისუფლების წარმომადგენლებს 20 ივნისის შემდეგ დაკავებულების საქმეზე განმარტება არ გაუკეთებიათ, გასაკვირი არაა, რომ საერთაშორისო წრეებმა ეს საკითხი პოლიტიზირებულად შეაფასონ.
როგორც უსუფაშვილმა ჟურნალისტებთან შესაბამისი კითხვის საპასუხოდ აღნიშნა, 20 ივნისის აქციებზე კანონდარღვევას დემონსტრანტებზე მეტად სახელისუფლებო პირებისა და სამართალდამცველების მხრიდან ჰქონდა ადგილი.
„მე ამ თემაზე 20 ივნისსვე მქონდა ძალიან მკაფიო პოზიცია, რომ დემონსტრანტების მხრიდან თუ იყო რამე კანონდარღვევა, კანონდარღვევა იყო გაცილებით მეტი და მაღალი სახალისუფლებო პირებისა და პოლიციის მხრიდან.
სახელმწიფო გადატრიალების მცდელობა, ანუ შეიარაღებული თუ არაკონსტიტუციური გზით ხელისუფლების დამხობის მცდელობა, რომელიც ხელისუფლებამ გამოიტანა წინა პლანზე, როგორც აღკვეთილი დანაშაული, აგერ უკვე ხუთი თვეა და ხუთი სიტყვა არ უთქვამს ხელისუფლებას, თუ რაშია საქმე, ამიტომ ნურავის ნუ უკვირს, თუ საერთაშორისო წრეებს ექნებათ ეს შთაბეჭდილება, რომ ხელისუფლება ხალხს აბრალდებს იმ ტიპის დანაშაულს, რომლის ნიშანწყალიც არ მოიძებნება და რომელსაც მხოლოდ პოლიტიკური მოტივი აქვს“,- განაცხადა უსუფაშვილმა.