ვხედავთ, რომ უზენაეს სასამართლოში ყველა ადგილი ვერ შეივსება, თუმცა ჩვენი ამოცანა მაინც არის ის, რომ საუკეთესო კანდიდატურები შევარჩიოთ, საუკეთესო გადაწყვეტილება მივიღოთ იმისათვის, რომ სასამართლო იყოს ქმედუნარიანი, - ამის შესახებ პარლამენტის თავმჯდომარის პირველმა მოადგილემ, გია ვოლსკიმ უზენაესი სასამართლოს მოსამართლეობის კანდიდატებზე საუბრისას განაცხადა.
მისივე თქმით, უმრავლესობის სხდომაზე უზენაესი სასამართლოს მოსამართლეობის კანდიდატებზე იმსჯელეს, ასევე განიხილეს იურიდიულ საკითხთა კომიტეტის შესაბამისი ანგარიში და უმრავლესობის წევრებმა ამ საკითხებთან მიმართებაში საკუთარი პოზიციები ჩამოაყალიბეს.
„მთავარი თემა მე მაინც მგონია არის ის, რომ დაახლოებით 6 ათასზე მეტი განუხილავი საქმე დევს სასამართლოში და ცოტა ხანში ეს სერიოზულ პრობლემად გადაექცევა ქვეყანას, რაც გასათვალისწინებელია. დღეს, ჩვენი სასამართლო ყველა შესაბამისი კომპეტენტური საერთაშორისო ორგანიზაციის შეფასებით მსოფლიოში პირველ ოცეულშია, 18 - 19 ადგილზეა და ბევრ დასავლეთ ევროპულ ქვეყანას სტანდარტით უსწრებს, მაგრამ ეს არ არის საკმარისი“, - განაცხადა გია ვოლსკიმ.
ინფორმაციას პარლამენტის პრესსამსახური ავრცელებს.