სამოქალაქო მოძრაობა „გაბედეს" 4 აქტივისტი მცხეთის პოლიციაში მივიდა
სამოქალაქო მოძრაობა „გაბედეს" აქტივისტები: ირაკლი ქართველიშვილი, ბექა ნათელაშვილი, მიხეილ ქუმსიშვილი და ლევან ლელაშვილი მცხეთის პოლიციაში გამოცხადდნენ. მათ ადგილზე სამართალდარღვევის ოქმები შეუდგინეს, რომელიც სასამართლოში იქნება წარდგენილი.
მათი ადვოკატის მარიამ ცუცქირიძის განცხადებით, სამართალდარღვევის საქმე 166-ე და 173-ე მუხლებით მიმდინარეობს, რაც წვრილმან ხულიგნობას და პოლიციისთვის წინააღმდეგობის გაწევას გულისხმობს.
„შეადგინეს სამართალდარღვევის ოქმები, რომლებიც ჩაგვაბარეს. ოთხივე ოქმში წერია აბსოლუტურად იდენტური ტექსტი, რომ ახალგაზრდები საზოგადოების მიმართ გამოირჩეოდნენ უპატივცემულობით და იგინებოდნენ. აღნიშნულ ოქმებს ბუნებრივია არ დავეთანხმეთ, რაც ოფიციალურად დავადასტურეთ წერილობით. ეს სამართალდარღვევის ოქმები წარდგენილი იქნება სასამართლოში“, - განაცხადა მარიამ ცუცქირიძემ.
