ომბუდსმენი პარლამენტს მიმართავს, მოსამართლეების მხოლოდ ის რაოდენობა დანიშნოს, „რაც სასიცოცხლოდ აუცილებელია უზენაესი სასამართლოს ფუნქციონირებისთვის“

იუსტიციის უმაღლეს საბჭოში წარმართულმა პროცესმა ვერ შეძლო ობიექტური დამკვირვებლის დარწმუნება იმაში, რომ საბოლოოდ ყველაზე კომპეტენტური და კეთილსინდისიერი კანდიდატები წარედგინა საქართველოს პარლამენტს საქართველოს უზენაეს სასამართლოში მოსამართლის 20 ვაკანსიაზე უვადოდ ასარჩევად, - ამის შესახებ საქართველოს სახალხო დამცველმა ნინო ლომჯარიამ განაცხადა.

მისი თქმით, იუსტიციის უმაღლეს საბჭოში სახალხო დამცველის მიერ უზენაესი სასამართლოს მოსამართლეების შერჩევაზე დაკვირვებამ მრავალი პრობლემა გამოავლინა, რომლებმაც არსებითი გავლენა მოახდინეს პროცესის სამართლიანად, მაღალი სტანდარტებით წარმართვაზე.

„შერჩევის პროცესი წარიმართა ფარულად, გამოიკვეთა საბჭოს წევრთა მიერ ურთიერთშეთანხმების შემთხვევები, რაც პროცესის სამართლიანად წარმართვას აყენებდა ეჭვქვეშ. ამავდროულად, მოქმედმა საკანონმდებლო ჩარჩომ, რომლის მიხედვითაც საბჭოს გადაწყვეტილებები არ საბუთდება და არ საჩივრდება, ვერ უზრუნველყო კონკურსში მონაწილეთა უფლებების დაცვა. ასევე საკანონმდებლო ჩანაწერის მიუხედავად, პარლამენტისთვის წარდგენილ კანდიდატებს შორის აღმოჩნდნენ პირები, რომელთა მიერ კანონით განსაზღვრული მინიმალური აკადემიური ხარისხის ფლობა კითხვებს წარმოშობს“,- განაცხადა ნინო ლომჯარიამ.

სახალხო დამცველის განმარტებით, პარლამენტმა მოსამართლეების მხოლოდ ის რაოდენობა უნდა დანიშნოს, რაც აუცილებელი და მნიშვნელოვანია უზენაესი სასამართლოს ფუნქციონირებისთვის.

„მივმართავ პარლამენტს, რომ მხედველობაში მიიღოს სახალხო დამცველის მონიტორინგის ანგარიში და ასევე ის ფაქტი, რომ საკონსტიტუციო სასამართლოში არის გასაჩივრებული აღნიშნული კანონმდებლობა. ამიტომ ჩემი სურვილი იქნებოდა, რომ პარლამენტმა დანიშნოს მხოლოდ ის რაოდენობა მოსამართლეებისა, რაც არის სასიცოცხლოდ აუცილებელი და მნიშვნელოვანი უზენაესი სასამართლოს ფუნქციონირებისთვის“, - განაცხადა ნინო ლომჯარიამ.

იოსებ ბარათაშვილი - ახლა მთავარია, გამოძიებამ უტყუარად დაადგინოს იმ პირების ვინაობა, რომელთა ქმედებამაც გამოიწვია შაქარაშვილის გარდაცვალება
ქართული პრესის მიმოხილვა 10.07.2020
ალექსეი მალაშენკო - ვინც არ უნდა მოიგოს საქართველოს არჩევნებში, აფხაზეთისა და სამხრეთ ოსეთის საკითხებში არაფერი შეიცვლება, ამიტომ, კრემლისთვის პრინციპული მნიშვნელობა არ აქვს, ვინ გაიმარჯვებს
ყაზახეთ-საქართველოს თანამშრომლობის ახალი ეტაპი იწყება
სუბსიდირებული იპოთეკური სესხი - ახალი შესაძლებლობა ტერაბანკისგან
სილქნეტის მობილური აბონენტები თიბისის მობაილბანკით სარგებლობას ინტერნეტის დახარჯვის გარეშე შეძლებენ