პროვოკაციული ქმედებები დესტრუქციული ძალებისგან ზოგჯერ ყოველგვარ ზღვარს გადადის, - ასე გამოეხმაურა აჭარის ავტონომიური რესპუბლიკის მთავრობის თავმჯდომარე თორნიკე რიჟვაძე შუახევის მერიასთან გამართულ აქციას, სადაც საჯარაო მოხელეებს, სამართალდამცავებსა და არასამთავრობო ორგანიზაცია „ალტერნატივას" წევრებს შორის ფიზიკური და სიტყვიერი დაპირისპირება მოხდა.

თორნიკე რიჟვაძე განმარტავს, რომ ყოველგვარი ძალადობა არის მიუღებელი და სახელმწიფო მოხელეები თმენის ვალდებულებას ემორჩილებიან.

„ყველა სახელმწიფოს მოხელე და თანამდებობის პირი, რა თქმა უნდა, მაქსიმალურად თმენის ვალდებულებას ემორჩილება, რომელიც გვაქვს.

მაგრამ ასევე პროვოკაციური ქმედებები ამ კონკრეტული დესტრუქციული ძალებისგან, ზოგჯერ ყოველგვარ ზღვარს გადადის. მე კიდევ ერთხელ მოვუწოდებ ყველას, რომ ყოველგვარი ძალადობა არის მიუღებელი, ყველას მოვუწოდებ, რომ საქმის კეთება გავაგრძელოთ",- განაცხადა თორნიკე რიჟვაძემ.