დამოუკიდებელი დეპუტატის თამარ ხულორდავას შეფასებით, მმართველი გუნდის უკან წაღებულმა დაპირებამ პროპორციულ საარჩევნო სისტემაზე გადასვლასთან დაკავშირებით, „ქართული ოცნებისადმი“ საქართველოს მოქალაქეების, მათ შორის პოლიტიკური პარტიების და საერთაშორისო პარტნიორების ნდობას გამოუსწორებელი ზიანი მიაყენა.

„ეს არის სერიოზული პრობლემა მიუხედავად იმისა, აცნობიერებენ თუ არა ჩემი ყოფილი თანაგუნდელები, - განაცხადა თამარ ხულორდავამ პარლამენტის პლენარულ სხდომაზე სიტყვით გამოსვლისას განაცხადა.

მისივე განმარტებით, აღნიშნული საკითხი მისთვის ძალიან პრინციპული იყო და ამიტომაც მიიღო უმრავლესობის დატოვების გადაწყვეტილება.

„დღეს პირველი შემთხვევაა, როცა ამ დარბაზში ვარ არა როგორც უმრავლესობის წევრი, არამედ როგორც დამოუკიდებელი დეპუტატი. პირველ რიგში მინდა ამ ტრიბუდანაც ჩემი და ჩემი თანამოაზრეების გადაწყვეტილებები განვმარტო. საზოგადოების დიდმა ნაწილმა ჩემი და ჩემი თანამოაზრეების გადაწყვეტილება მოიწონა, თუმცა არიან ადამიანები, ვინც თვლის, რომ პროპორციულ სისტემასთან დაკავშირებით მიღებული გადაწყვეტილება არ იყო ისეთი მნიშვნელოვანი, რომ ამას ასეთი მძიმე გადაწყვეტილების მიღება გამოეწვია. ჩემთვის ეს არის ძალიან პრინციპული საკითხი. პირველ რიგში, პროპორციული სისტემა უფრო სამართლიანია, ვიდრე დღეს არსებული შერეული საარჩევნო სისტემა. პროპორციული სისტემა უნდა ყოფილიყო გარანტი იმის, რომ არც ერთ პოლიტიკურ ძალას სრული თავისუფლება არ ექნებოდა. მთლიანობაში ეს უნდა გამხდარიყო პასუხისმგებლობის განაწილების საშუალებაც ძალაუფლების გადანაწილებასთან ერთად და უფრო დაბალანსებულ პოლიტიკამდე უნდა მივეყვანეთ. მე მიხარია, რომ ეს გადაწყვეტილება ამ პარლამენტს უკვე მიღებული აქვს და 2024 წლიდან მაინც ეს ძალაში იქნება“,-განაცხადა თამარ ხულორდავამ.

როგორც მან აღნიშნა, პარტიებს შორის დაპირისპირება და სრული უნდობლობა ქვეყნისთვის კარგი ნამდვილად არ არის და სწორედ მმართველ პარტიას აქვს პასუხისმგებლობა, რომ ეს პროცესები ნორმალიზაციისკენ წავიდეს.