მზად ვართ, მხარი დავუჭიროთ ე.წ. გერმანულ მოდელს ან მის ადაპტირებულ ვერსიას, რომელიც იქნება საქართველოს კანონმდებლობასთან თავსებადი და რომელზედაც დადებითი დასკვნა იქნება გაცემული ეუთოსა და ვენეციის კომისიის მხრიდან, - ამის შესახებ ფრაქცია „დამოუკიდებელი დეპუტატების“ თავმჯდომარე მარიამ ჯაშმა პარლამენტის პლენარულ სხდომაზე განაცხადა, რითაც გამოეხმაურა ოპოზიციის მოთხოვნას საარჩევნო სისტემის ცვლილებაზე. მისივე თქმით, მონოპოლია და ოლიგოპოლია საქართველოს პოლიტიკას აზიანებს.

„ე. წ. გერმანულ მოდელთან დაკავშირებით არაერთ სამართლებრივ შეკითხვას და ურთიერთგამომრიცხავ პოზიციებს ვისმენთ თავად კონსტიტუციონალისტებს შორის. ამდენად, ვფიქრობთ, რომ ყველაზე მნიშვნელოვანი ფრაქციის საბოლოო გადაწყვეტილებისათვის იქნება ეუთო-სა და ვენეციის კომისიის ოფიციალური დასკვნები აღნიშნულ მოდელთან დაკავშირებით. ჩვენ მზად ვართ, მხარი დავუჭიროთ ე.წ. გერმანულ მოდელს ან მის ადაპტირებულ ვერსიას, რომელიც იქნება საქართველოს კანონმდებლობასთან თავსებადი და რომელზედაც დადებითი დასკვნა იქნება გაცემული ეუთოსა და ვენეციის კომისიის მხრიდან, რადგან მზად ვართ, მხარი დავუჭიროთ დეპოლარიზაციის პროცესს. ვფიქრობთ, მონოპოლია და ოლიგოპოლია საქართველოს პოლიტიკას აზიანებს და უფრო ფართო პოლიტიკური წარმომადგენლობისთვის უნდა გადაიდგას ნაბიჯები,“ - განაცხადა მარიამ ჯაშმა.