„საპარტნიორო ფონდის“ მიერ სასტუმრო „ბორჯომი ლიკანის“ გაყიდვის მიზნით გამოცხადებული აუქციონი არ შედგა. ამის შესახებ „ინტერპრესნიუსს“ „საპარტნიორო ფონდში“ განუცხადეს.
სასტუმროს გაყიდვის მიზნით საჯარო აუქციონი 2019 წლის 6 დეკემბერს იყო დაანონსებული, „ინტერპრესნიუსი“ დაინტერესდა რა შედეგით დასრულდა ის, როგორც „საპარტნიორო ფონდში“ აცხადებენ, ხუთვარსკვლავიანი სასტუმრო „ბორჯომი ლიკანის“ შესყიდვით, არც ერთი ინვესტორი არ დაინტერესდა და შესაბამისად, აუქციონი ხელახლა გამოცხადდება.
„აუქციონი არ შედგა, რადგან ინტერესი არ იქნა გამოხატული. უნდა გაანალიზდეს რატომ არ შედგა აუქციონი. შემდეგ წინადადებები უნდა წარვუდგინოთ ჩვენს სამეთვალყურეო საბჭოს და როდესაც დამტკიცდება, ხელახლა გამოვიტანთ აუქციონზე”, - აცადებენ „საპარტნიორო ფონდში“.
შეგახსენებთ, რომ „საპარტნიორო ფონდი“ 2018 წლიდან სასტუმრო „ბორჯომი ლიკანის“ 100%-იანი წილის მფლობელია. გამოცხადებულ აუქციონზე სასტუმროს მინიმალური საწყისი ფასი 37 565 408 აშშ დოლარი იყო.