ფრაქცია "დამოუკიდებელი დეპუტატები" პარლამენტის სესიას, სადაც უზენაესი სასამართლოს მოსამართლეობის კანდიდატებთან დაკავშირებული კენჭისყრა გაიმართება, არ დაესწრებიან.
როგორც ფრაქციის თავმჯდომარე მარიამ ჯაში განმარტავს, მათი ფრაქციის 6 წევრიდან 5- მა უმრავლესობა დატოვა სწორედ უზენაესი სასამართლოს კანდიდატთა სიის წარმოდგენის შემდეგ.
"ჩვენ ვემიჯმებით კენჭისყრის პროცედურას და პროცედურის თანახმად, რეგლამენტის 91-ე მუხლით ეს გახლავთ ბოიკოტის პროცედურა. იმ დღეს, როცა მოხდება მოსამართლეობის კანდიდატების კენჭისყრა პლენარულ სესიაზე, ფრაქცია „დამოუკიდებელი დეპუტატები“ არ დაესწრება სხდომას.
არ ვიცი, რამდენად დარჩება მარტო „ქართული ოცნება“ აღნიშნულ გადაწყვეტილებაში. არ გამოვრიცხავ, რომ კოლეგებმა, დამოუკიდებელმა დეპუტატებმა მიიღონ სხვა გადაწყვეტილება. ეს არის თითოეული დეპუტატის გადაწყვეტილება და პოზიცია, ამიტომ დაველოდოთ რა მოხდება კენჭისყრის დღეს,"- განაცხადა მარიამ ჯაშმა.
მოსამართლეობის კანდიდატების კენჭისყრა პარლამენტში ხვალ, 12 დეკემბერს გაიმართება.