საპარლამენტო უმრავლესობის წევრი კახა ოქრიაშვილი აცხადებს, რომ „ნაციონალური მოძრაობის“ დეპუტატის, ნიკა მელიასთვის მანდატის შეწყვეტას მხარს არ დაუჭერს.
როგორც ოქრიაშვილმა პარლამენტში ჟურნალისტებს განუცხადა, ის მომხრეა, რომ დეპუტატს ძლიერი იმუნიტეტი ჰქონდეს, რათა მასზე გავლენა ვერ მოახდინონ.
„არ დავუჭერ მხარს. მე ვთვლი, რომ ორი შეხედულებაა დეპუტატის იმუნიტეტთან დაკავშირებით. ერთი ხედვა არის, რომ დეპუტატებს არ უნდა ჰქონდეთ ძლიერი იმუნიტეტი და მეორე ხედვა არის, რომ თუ დეპუტატს არ აქვს სათანადოდ დაცვა, ის ძლიერი ვერ იქნება და დეპუტატის მანიპულირება უფრო ადვილი ხდება. მე ვფიქრობ, რომ დეპუტატის იმუნიტეტი უნდა იყოს მყარი და მე არ დავუჭერ მხარს”, - განაცხადა ოქრიაშვილმა.
რაც შეეხება უზენაესი სასამართლოს მოსამართლეობის კანდიდატების კენჭისყრას, მისი თქმით, სულ 6-7 კანდიდატია, ვისაც მხარს დაუჭერს, თუმცა, ის კონკრეტულ სახელებსა და გვარებს არ ასახელებს.