საქართველოს კომუნიკაციების ეროვნული კომისიის წევრის ვაკანტურ თანამდებობაზე პარლამენტმა კახა ბექაური აირჩია, რომელიც ამჟამად კომისიის თავმჯდომარის პოსტს იკავებს და ვადა 2020 წლის 24 იანვარს ეწურება. მის კანდიდატურას პლენარულ სესიაზე მხარი 78-მა დეპუტატმა დაუჭირა.

საქართველოს კომუნიკაციების ეროვნული კომისიის წევრის ერთ ვაკანტურ თანამდებობაზე ასარჩევად წარმოდგენილი იყო 3 კანდიდატი: ივანე მახარაძე, კახა ბექაური და მარიამ სულაბერიძე.

ივანე მხარაძის კანდიდატურას მხარი დაუჭირა 31-მა დეპუტატმა, 7 კი წინააღმდეგ წავიდა. მარიამ სულაბერიძის კანდიდატურას კი 25 მომხრე ჰყავდა. კენჭისყრის შედეგების თანახმად, აღნიშნულ პოზიციაზე კახა ბექაურის კანდიდატურა დამტკიცდა.

ცნობისთვის, კახა ბექაური 2017 წელს კომუნიკაციების ეროვნული კომისიის თავმჯდომარედ აირჩიეს. ამ პოსტზე მას ვადა 2020 წლის 24 იანვარს ამოეწურება, ხოლო კომისიის წევრის პოზიციაზე მუშაობას 25 იანვრიდან შეუდგება.