ნათია თურნავა  -  მგზავრთნაკადის ზრდა, მათთვის უსაფრთხო და მაქსიმალურად კომფორტული პირობების შექმნა მნიშვნელოვანია ტურიზმისა და არა მხოლოდ ამ დარგის განვითარებისთვის

ეკონომიკისა და მდგრადი განვითარების სამინისტროში საქართველოს აეროპორტებში არსებული მდგომარეობისა და სამომავლო პროექტების შესახებ პრეზენტაცია გაიმართა. ამის შესახებ „ინტერპრესნიუსს“ საქართველოს ეკონომიკისა და მდგრადი განვითარების სამინისტროდან აცნობეს. მინისტრმა ნათია თურნავამ „საქართველოს აეროპორტების გაერთიანების“ ხელმძღვანელებისგან მოისმინა დეტალური ინფორმაცია მგზავრთნაკადის სტატისტიკის, მიმდინარე და დაგეგმილი პროექტების, მათ შორის, საქართველოს ავიაბაზარზე ახალი ავიაკომპანიების შემოსვლის, ფრენების უსაფრთხოების ამაღლებისა და მგზავრობის პირობების გაუმჯობესების კუთხით გადადგმული ნაბიჯების შესახებ.

პრეზენტაცია კომპანიის გენერალურმა დირექტორმა გიორგი ჩოგოვაძემ წარმოადგინა. მისი თქმით, საქართველოს ხუთივე აეროპორტის - სამი საერთაშორისოს და ორი ადგილობრივის - განვითარებისთვის 2019 წელს მნიშვნელოვანი გადაწყვეტილებები იქნა მიღებული. მან განსაკუთრებული ყურადღება გაამახვილა აეროპორტებში მგზავრთნაკადის სტატისტიკაზე.

გიორგი ჩოგოვაძის ინფორმაციით, საქართველოს აეროპორტების გაერთიანების პროგნოზით, თბილისის აეროპორტში წლის დასაწყისში არსებული მოლოდინით, როდესაც რუსეთის მიმართულებით ფრენები სრულდებოდა, ნოემბერში 13-პროცენტიანი ზრდა უნდა ყოფილიყო, რეალურად კი თბილისის შემთხვევაში გვაქვს 18-პროცენტიანი კლება. ბათუმის აეროპორტში საპროგნოზო 15-პროცენტიანი ზრდის ნაცვლად, მხოლოდ 7-პროცენტიანი ზრდა დაფიქსირდა. ერთადერთი საერთაშორისო აეროპორტი, სადაც არსებული მაჩვენებლები მოლოდინებზე მეტია, ქუთაისის აეროპორტია. 2019 წლის დასაწყისში, ნოემბრის თვეში 42 პროცენტიანი ზრდის მოლოდინი იყო, რეალურმა ზრდამ კი 50 პროცენტი შეადგინა. საქართველოს აეროპორტების გაერთიანების ხელმძღვანელის შეფასებით, ამის მიზეზია ქუთაისში ახალი დაბალბიუჯეტიანი ავიაკომპანიის „Ryanair“ - ის შემოსვლა და „Wizz air“-ის მიერ ახალი მიმართულებების დამატება.

გიორგი ჩოგოვაძის განცხადებით, ქუთაისის საერთაშორისო აეროპორტში დასასრულს უახლოვდება სარეკონსტრუქციო სამუშაოები, რის შედეგადაც აეროპორტის გამტარუნარიანობა 4-ჯერ გაიზრდება და საათში 1200 მგზავრის შეუფერხებლად გატარებას შეძლებს. ახალი აეროპორტის საშუალო წლიური გამტარუნარიანობა 2 მლნ მგზავრს შეადგენს. მისი თქმით, ქუთაისის აეროპორტის ახალი ტერმინალის მშენებლობა პროექტით გათვალისწინებულ ვადებში დასრულება.

“ჩვენ სამოქალაქო ავიაციის სფეროში ვაგრძელებთ „ღია ცის“ პოლიტიკას, რაც უზრუნველყოფს ახალი ავიაკომპანიების შემოსვლას და ახალი პირდაპირი მიმართულებების განვითარებას. ეს ასევე არის გაზრდილი მგზავრთნაკადი, რომელთა დიდი ნაწილიც ტურისტული მიზნებით ჩამოდის საქართველოში. ამდენად, მგზავრთნაკადის ზრდა და მათთვის უსაფრთხო და მაქსიმალურად კომფორტული პირობების შექმნა მნიშვნელოვანია ტურიზმისა და ქვეყნის ეკონომიკის სხვა სექტორების განვითარებისთვის,“ - განაცხადა ნათია თურნავამ.

ამავე დროს, მინისტრის თქმით, აუცილებელია, ქუთაისის აეროპორტში სარეკონსტრუქციო სამუშაოების პარალელურად მგზავრთა მომსახურების ხარისხის გაუმჯობესება. ნათია თურნავამ საქართველოს აეროპორტების გაერთიანების ხელმძღვანელობას როგორც ქუთაისში, ასევე საქართველოს სხვა აეროპორტებში მიმდინარე და დაგეგმილი პროექტების განხორციელებაზე მკაცრი მონიტორინგი დაავალა.

ალექსეი მალაშენკო - ვინც არ უნდა მოიგოს საქართველოს არჩევნებში, აფხაზეთისა და სამხრეთ ოსეთის საკითხებში არაფერი შეიცვლება, ამიტომ, კრემლისთვის პრინციპული მნიშვნელობა არ აქვს, ვინ გაიმარჯვებს
ქართული პრესის მიმოხილვა 09.07.2020
ზაალ ანჯაფარიძე - შაქარაშვილის საქმესთან დაკავშირებით კითხვები უფრო მეტია, ვიდრე პასუხები, რაც გამოწვეულია რამდენიმე გარემოებით
დეველოპერული კომპანია "ბლოქსი" მომხმარებლებს ბინებზე გრანდიოზულ ფასდაკლებას სთავაზობს
სადაზღვევო კომპანია "ბენეფიტსი" მცირე და საშუალო ბიზნესკომპანიებს სპეციალურ პირობებს სთავაზობს
FDA-იმ IQOS-თან დაკავშირებით გადაწყვეტილება მიიღო და კომპანიის მარკეტინგის უფლება მისცა  (R)
„ალიანს ჯგუფი“ BDO-სთან პარტნიორობით SAP Business One-ს ნერგავს
გაზელ ფაინენსის ინვესტიცია სანიორეს მეღვინეობაში, ნაფარეულის მიკროზონაში ვენახების მფლობელ კომპანიაში
„თბილღვინო“ განაგრძობს საკუთარი ვენახების განვითარებას