ეს არის ბიძინა ივანიშვილის შურისძიება, ეს არის შურისძიება ნიკა მელიას წინააღმდეგ, რადგან ნიკასი ეშინია,- ასე ეხმიანება "ნაციონალური მოძრაობის" წევრი თინა ბოკუჩავა ნიკა მელიასთვის სადეპუტატო მანდატის შეწყვეტის გადაწყვეტილებას.

მან დეპუტატებს მონები უწოდა და განაცხადა, რომ ამ გადაწყვეტილებით მათ და ნიკა მელიას ვერაფერს დააკლებენ.

"ესენი არიან მონები, ამით ნიკას და ვერც ერთ ჩვენგანს ვერაფერს დაგვაკლებენ, რადგან ჩვენი ბრძოლა გაგრძელდება გამარჯვებამდე. ეს არის ბიძინა ივანიშვილის შურისძიება, ეს არის შურისძიება ნიკას წინააღმდეგ, რადგან ნიკასი ეშინია, იმიტომ რომ ნიკა არის მებრძოლი. ეს 88 მონა ზის პარლამენტის დარბაზში და უკვირთ რატომ ყარს პარლამენტი, იმიტომ ყარს, რომ მონებით არის დღეს პარლამენტი დაკომპლექტებული, მაგრამ ისინი ვერაფერს დააკლებენ ნიკა მელიას, რომელიც იყო და იქნება ბრძოლის ავანგარდში,"- განაცხადა თინა ბოკუჩავამ.

ის ასევე გამოეხმაურა იმ ფაქტს, რომ გადაწყვეტილებას მხარი არ დაუჭირა კახა ოქრიაშვილმა და განაცხადა, რომ სავარაუდოდ, ადამიანები რომლებმაც ეს გადაწყვეტილება მიიღეს, "გასვრილები არიან" და სწორედ ამიტომ ეშინიათ ბიძინა ივანიშვილის.

"რა უნდა გაიკეთოს ბიძინა ივანიშვილმა? დიდი დიდი დაგიტეროროს ბიზნესი, კახა ოქრუაშვილს ძალიან სერიოზული ბიზნესები აქვს. წილოსანს რისი ეშინია მაგალითად, რომ მამამისის ბიზნესებს დაესხმება თავს ბიძინა ივანიშვილი? ფაქტია, რომ ეს ადამიანებიც გასვრილები არიან, კორუფციაში არიან გარეულები, უამრავი სიბინძურე იცის ივანიშვილმა და ამით აკონტროლებს მათ,"- განაცხადა თინა ბოკუჩავამ.