„ქართული ოცნება” გახდა სამართალმემკვიდრე და მორალური მემკვიდრე „ნაციონალური მოძრაობის“, ოღონდ მხოლოდ იმ ცუდის, რასაც „ნაციონალური მოძრაობა“ აკეთებდა, - ამის შესახებ,ერთიანი საქართველო-დემოკრატიული მოძრაობის” ლიდერმა ნინო ბურჯანაძემ ჟურნალისტებს ოპოზიციური პარტიების ლიდერებისა და დიპლომატიური კორპუსის შეხვედრის დაწყებამდე განუცხადა.

ბურჯანაძის თქმით, შეხვედრაზე საუბარი შექმნილ პოლიტიკურ კრიზისთან დაკავშირებით იქნება.

„საუბარი გვექნება ყველა იმ საკითხთან დაკავშირებით, რომელიც აქტუალურია პოლიტიკურ სპექტრში. საგანგებოდ გაკეთდება აქცენტი იმ წარმოუდგენელ უფლებადარღვევებზე, რასაც აკეთებს ხელისუფლება, როდესაც დამნაშავის მაგივრად თავდამსხმელს ამართლებს, როდესაც არის აბსოლუტურად უკანონო მოქმედებები, რა თქმა უნდა, ეს არის ძალიან მნიშვნელოვანი ჩვენთვის და გვინდა, რომ დეტალურად ჩავაყენოთ დიპლომატიური კორპუსი საქმის კურსში. ბუნებრივია, საუბარი იქნება იმ სამარცხვინო ფაქტზეც, როცა მოსამართლეები დამტკიცდა ისე, როგორც ამას „ქართული ოცნება“ დიდი ხანია ცდილობდა, „ქართული ოცნება“ გახდა სამართალმემკვიდრე და მორალური მემკვიდრე „ნაციონალური მოძრაობის“, ოღონდ მხოლოდ იმ ცუდის, რასაც „ნაციონალური მოძრაობა“ აკეთებდა იმიტომ, რომ ყველაფერი ეს ცუდი მართლდებოდა და თეთრდებოდა სასამართლოში ასე, რომ „ქართულ ოცნებას“ დღეს ამაზე ხმა არ აქვს ამოსაღები. ბუნებრივია, ვისაუბრებთ ყველა დანარჩენ სხვა თემებთან დაკავშირებით“, - განაცხადა ბურჯანაძემ.